بالصور| عبر “فيس بوك”.. أم تستغيث بمجدي يعقوب:

وقالت الأم في تدوينتها: “جماعة أنا ابني ما بين الحياة والموت، حالته نادرة ومش بتحصل غير واحد على المليون و ياريت تساعدوني، بنشر البوست في كل حتة يمكن نوصل إلى مسؤول يساعدني او إعلامي أو رجل أعمال يسفرني برة مصر، أنا عندي أمل كبير في ربنا وفيكم أنكم تساعدوني نوصل لـ دكتور مجدي يعقوب، أنا أم وأكيد هتحسوا بيا لأن أصعب حاجة أن يكون ابنك أو بنتك مريض ومش لاقي مكان للعلاج”.

وتابعت: “أنا من الإسكندرية، وولدت يوم 9/9/2016، وكنت متابعة مع دكتور طارق قرقور أول ما ولدت ابني سليم الدكاترة كشفو عليه لقو أن قلبه في جهة اليمين وعنده ثقبين كبار في البطين وانعكاس شرياني، وانسداد في شريان، وطبعا الحالة مش بتحصل كتير أن يكون في طفل في كل المشاكل دي”.

وأضافت: “روحت بيه أكبر دكاترة قلب أطفال في الإسكندرية وفي القاهرة وكلمت دكتور بيشتغل في مؤسسة مجدي يعقوب اسمه دكتور أحمد عفيفي، قال إن حالة ابني معقدة جدا ولازم تتعمل في مؤسسة مجدي يعقوب مش في أي مكان تاني وكلهم اجمعو أن لازم يتحول ورقه للدكتور مجدي يعقوب طبعا على طول بعت الورق ردو علينا بعد ثلاث أسابيع، ورفضوا الحالة لأن مفيش مكان وفكرنا على طول للسفر في الخارج لقينا هيتكلف مبلغ كبير أوي، وأنا طبعا معيش المبلغ دا”.

وأردفت الأم: “ابني عنده 3 شهور ونسبة الأوكسجين عنده بتقل وأنا مرعوبة يحصله حاجة بعد الشر، ومش عارفة أساعده لأن مفيش مكان لـ ابني بجد أنا نفسي أفرح بـ ابني زي أي أم، ياريت يا جماعة تساعدوني أرجوكم لأن أنا مدمرة على حال ابني شايفاه كل يوم أسوأ عن الأول ياريت تساعدوني وتنشروا البوست ده في كل حتة على أمل حد مسؤل يشوف أو إعلامي ورجل أعمال يساعدني”.