أنا الفلاح

سِكَكْ بِنقْطَعها مفروشة بِشوك وبْضِلّ

أيام تبان شمسها.. قبل الصباح ما يهِلّ

وايّام تغيب شمسها.. قبل الضلام ما يحِلّ

فلاح.. وبازْرَع «سَبَل» بيحصَّدونى الغِلّ

أضحك فى وش العدو.. يزعل فى وِشِّى الخِلّ

أقطعها من غير ما اكِلّ.. تاكُلنى دون ما تْكِلّ

وكل ما زاد حصيدى.. لُقمتى.. بِتْقِلّ!!

وماشى.. وادِى السنين ما غيِّرت لونْها

بكل حاكم.. بِنَفْس اللون.. يلَوِّنْها

بطَّلْت أحلم.. أنا مالِيّا غير فاسى

متعلَّقة بيه حياتى وباقِى أنفاسى..

واذا نمت بيبات معايا فاسى فى راسى

عارف حدودى.. وعارف هُمَّ مين ناسى.

ولا اللى ضاعت فى يوم مِنِّى باقول فينها

تُخُونّى ما تخُون أنا ماليش فى تَخْوينْها

باشوف بعينى وعمرى ما شفت من عينها

ما هو كلّ فعلٍ جميل.. على أصولُه.. يدِلّ

كرامتى تُوبى وادوس الكِبْر.. بمداسى

لا يضلِّلُونى بقُول ولا بَانْجرِف ولا اخِلّ

ولا أعاود طريق.. لو خِلْصُوا أنفاسى

يا إيديّا فيها.. يا فاتح مَيِّتى.. يا بافِلّ

مخضَّر الكام قيراط.. ماليش فى فدادينها

مادام فى أخضرها لو فيه عمر تانى ما امِلّ

اللقمة لو ناشفة.. إيه معنى القناية؟.. أبِلّ

وأما قبرى فَفَاحْتُه بْيدِّى.. بمَقاسى..

وورايا ولدى اللى زييى بكره حيقاسى

يِدِّى ويِدِّى.. الكرامة دَوا بيمْحِى الذُّل

وسكك.. بنقطعها مفروشة بشوك وِبْضلّ!!

التحرير