بالصور.. ضابط يوزع “تمر هندي” على الصائمين

كتب ـ محمد الصاوي:

تداول مستخدمو مواقع التواصل الاجتماعي “فيس بوك”، صورًا لأحد الضباط بمدينة القاهرة الجديدة أثناء أداء عمله بأحد الكمائن المرورية بمدينة الرحاب.

وبتتبع مصدر الصور استطاع مصراوي، الوصول الى صاحبها وهو الرائد ممدوح الشافعي معاون مباحث قسم أول القاهرة الجديدة، ويروي الشافعي لمصراوي:” منذ أول يوم في رمضان وانابكون حريص على أداء هذا العمل طواعية بصحبة زملائي وطاقم الكمين عشان ناخد الثواب كلنا”.

ويكمل الشافعي، “شغلي كل يوم يبدأ من الساعة 12 ظهرًا حتى الـ9 مساءً، وحتى لو يوم اجازتي بحاول أكون هناك.. ده غير أن زملائي زي الرائد تامر حسني والنقيب أحمد الأمير، بيخلوا بالهم أنهم يعملوا الموضوع على احسن وجه، قبل اذان المغرب تقريبًا بنص ساعة بنكون جهزنا الحاجة زي العصير وزجاجات المياه، والتمر الهندي اللي لازم يكون ساقع، وبنوقف العربيات بشكل عادي جدًا لدرجة ان فيهم ناس بتفتكر اننا بنسحب الرخص، وانا والضباط زمايلي بنمر على العربيات وبنوزع عليهم العصير والمياه لحد الاذان لما يأذن، وبعد كده بنروح نفطر احنا والعساكر”،

وأكمل الشافعي مازحًا: “الناس بتبقى الأول مستغربة شوية، وبيقولولي احنا اتعودنا على سحب الرخص مش توزيع العصير مما يثير الضحك، فبرد عليه بابتسامة ” كل سنة وانت طيب بس بعد رمضان هنسحب الرخص برده”.

ويشير الضابط:” الحقيقة الحاجة اللي بتتوزع دي مش بتاعتنا، دي ملك مجموعة بنات هما اللي اشتروها وطلبوا مننا اننا نوزعها نيابة عنهم، نظرًا لبعد اماكن سكنهم عن مدينة الرحاب، لكن احنا كلنا بنحس اننا بنشارك في الثواب وبيبقي احساس جميل انك تقدم خدمة للناس، غير الخدمات الروتينية”.

اخبارك