فاطمة ناعوت تكتب: حموكشة الربعاوي

عاوزة أقدم لكم الأخ “حموكشة الربعاوي”. ده شاب غلبان من أبناء رابعة وأحفاد المرشد.

معاه تقريبا دبلوم تجارة … دبلوم حقوق …. معهد دون بوسكو مش معروف على وجه الدقّة. حموكشة جلس يفكّر ويفكّر 🤔. ثم راح يفكّر🤔 ويفكّر: “ازاي اتشهر يا عالم يا هووو؟ عاوز أبقى مشهووووور!! بس أنا لا بطل في الكورة الشراب، ولا ليا في الشطرنج بتاع الأذكياء والعياذ بالله، ولا فلحت في اللحام تحت الماء🤓! ولا نفعت في التعليم حتى الإملاء باعكّ فيها. 🙄طب والعمل؟!”

هوب نطت في دماغه صورة عمك الشيخ “يوسف البدري” الله يرحمه، اللي كان عايش من مص دم الشعراء اللي بيرفع عليهم قضايا حِسبة من قصائدهم ويدفّعهم فلوس يضربها في جيبه.

كنا بنسميه “بُعبع المثقفين”، لغاية ما فضحته صحفية شاطرة في جلسة “رقية شرعية” وهو بيساوم الضحية.

بس عمك البدري كان حافظ شوية قرآن لزوم قضايا الحِسبة، مش زي حموكشة اللي بيغلط في كتابة اسم ربنا، 🙃وكل علاقته بالدين شوية أدعية من بتوع فيس بوك اللي معظمها مكتوب أصلا غلط.

كمان الشيخ البدري لم يشتهر إلا بعد ما رفع يجي ٤٠ قضية على ٤٠ شاعر، أما حموكشة صاحبنا، حظه في رجليه . قضية واحدة رفعها على شاعرة مشهورة، هوب! طلع :في السمااااااا..

ودلوقت عين الحسود فيها عود 👁بقا مدرسة كبيرة في “فن الشهرة المجانية” اسمها (حموكشيزم)، وله أتباع ومريدين، دايرين يفلّوا حواري فيس بوك ويتلطّعوا في صفحات المشاهير يلقّطوا رزقهم.

حكمة اليوم: عاوز تتشهر من غير تعب، فتّش عن حموكشة الربعاوي.
ومصر جميلة خليك فاكر.

 

الساخر