لن أسافر أمريكا مع وفد الثورة

الناشطة السياسية: لم أذهب لرابعة العدوية وأرى أن شرعية الإخوان ومرسي سقطت منذ أحداث الإتحادية

أسماء: مثلما أدنت عنف الإخوان فإنني أدين العنف ضدهم.. ومرتضى منصور كداب ومخادع

 

أكدت الناشطة أسماء محفوظ أنها لن تسافر أمريكا مع وفد الثورة وأنها رغم تأييدها لتمرد إلا أنها لم تشارك في أي من الفاعليات خلال الفترة الأخيرة لأنها حامل في الشهر الثامن. وقالت أسماء في بيان على صفحتها على فيسبوك أنها مثلما أدانت عنف الإخوان ضد المتظاهرين فإنها أدانت عنف الجيش والشرطة ضدهم لكنها لم تذهب لرابعة العدوية ولم تتحدث من فوق منصتها وترى أن شرعية مرسي انتهت منذ أن سالت الدماء أمام الإتحادية .

وإلى نص بيان أسماء محفوظ :

تشارك انا مسافرتش اسرائيل .. ومخدتش تمويل

ومرتضى منصور كداب وافاق ومخادع والمستندات اللي معاه دي من نسج خياله والا كان قدم بيها بلاغ

ومقعدتش من يومين مع سفير بريطانيا في كمبينسكي ومقعدتش مع سفيرة امريكا معرفش فين

ومش مسافرة امريكا مع وفد الثورة

ومرحتش رابعة وطلعت على المنصة

وانا كنت مقاطعة الانتخابات في الجولتين ومدعتش حد لانتخاب مرسي وقلت ان شفيق ومرسي وجهان لعملة واحدة

وكنت مؤيدة الشرعية لحد اول نقطة دم سالت في عهده عند الاتحادية وساعتها قلت يسقط حكم الاخوان

وطبعاُ مؤيدة لتمرد وضد التحالف مع رموز النظام السابق وضد حكم العسكر وضد غسل ايد الداخلية من دم الشهداء والتعذيب و و و و

وضد العنف بكل اشكاله من جميع الاطراف .. وضد الظلم حتى لو ظلم لمن ظلموا

وزي ما ادنت العنف من الاخوان تجاه المتظاهرين في كل المحافظات … ادانت العنف ضد الاخوان من الداخلية والجيش في المجازر اللي فاتت

ومش انا اللي أكلت الجبنة

والحقيقة الأكبر بقى .. اني مقدرش أشارك في أي حاجة الفترة دي عشان انا حامل في اخر الشهر التامن .. وفي ناس شايفة ان دي خيانة للثورة بس مع نفسهم

والله على ما اقول شهيد

كده انا رديت خلاص … صدقتوني؟ الاشاعات هتبطل؟ المزايدة هتقف؟ كده الثورة استفادت؟ كده حملة التشويه هتقل؟

كل اللي بجنيه من ردي اني بقيت احس اني متهمة طول الوقت ولازم مبررات لكل تصرف ولازم اقول رأيي في كل موقف وده شيء سخيف .. انا مش نخبة ولا شخصية عامة ولا مسئولة في الدولة

انا انسانة زيي زي احد فيكم ليه الحق انه يعارض ويؤيد ويتظاهر ويقعد على الكنبة

ممكن تدوني الحق اني أبقى زيكو؟؟؟ ممكن؟

 

البداية