هجوم شديد على محمود العسيلى بسبب «تغريدة»
تعرض الفنان محمود العسيلى، لهجوم شديد بسبب “تغريدة” نشرها عبر حسابه على “تويتر”، يتحدث خلالها عن من يخترقون خصوصيته.
كتب العسيلى على “تويتر”: “الإخوة اللى عايزين يبقوا ملحنين أو شعراء اللى بيبعتوا على الواتس آب الخاص ويكلمك فجأة على أنه متربى معاك وأنكوا كنتوا مع بعض فى المدرسة ويبعتلك إسهال من الأغانى وسبحان الله كلهم الجو بتاعك ولايقين عليك وباعتهملك مخصوص.. بلوك مع جزيل الشكر”.
بعدما نشر العسيلى تلك “التغريدة” تلقى سيلا من الهجوم عليه وصل لحد الشتائم، واتهمه كثيرون بالغرور.
لذا رد العسيلى على هذا الهجوم، قائلًا: “بالنسبة للهجوم الرهيب.. للتويتة السابقة.. والناس اللى بتسخن على أى حاجة.. كل اللى اقصده، هو غزو الخصوصية على نمرة تليفونى الشخصية.. شكرًا”.
وأضاف: “الناس مبتفهمش يعنى إيه خصوصية بنى آدم، ومش فاهمين برضو الفئة اللى أنا بتكلم عليها من الناس اللى بتطاردك على تليفونك والواتس آب بتاعك بشكل جنونى وطلعت أنا جالد المواهب الشابة ومغرور وتنك وشايف نفسى ومدعى.. وكتير نصحونى أنى مردش خصوصا بعد الكم الرهيب من قلة الأدب والسفالة والسواد اللى شوفتوا فى الريبلايز.. عمر ما كان الجرى ورا حلمك يخليك تعترض خصوصية غيرك بالشكل ده.. و ده اللى خلانى اكتب التويتة الأولانية.. عارف أن الموضوع صعب بس فى طرق تانية توصلك”.
تابع: “والحمد لله رب العالمين أنا أى حد موهوب بجد وبيوصلى شغله بطريقة محترمة بجد بحاول أساعده أقوله رأيى وأشوفله سكك مختلفة حتى لو شغله مش مناسبنى فنيا.. وعلى فكرة الميل بتاعى موجود وبرد عليه وحطه هنا وعلى الإنستجرام و شكرًا”.
