“مش هاقصِّر جلابيتى” و”باطل..ف أوعوا تزينوه” قصيدتان لماهر مهران

 

 

“مش هاقصر جلابيتى”

أنا مش هاقصِّر جلابيتى
ولا هاغيِّر القفطان
ولا هارمى تقاليد ورا ضهرى
…عاشت تتحدَّا الزمان
ولا هعادى النهر
ولا هحضن فى جفاف الصخر
ولا هابدل وشى السمح
بتكشيرة البلتاجى والعريان!!
دا عيشى مش عيشك
ولبسى مش لبسك
ف غور بعيد عنى
وأخلص من العفريت اللى لابسك !!
وأنا مش هاكون سمبلة ف أيدك
تقولى : شرِّق أشرِّق
غرِّب أغرِّب
يا خراب عمَّال يقرِّب
أنا مش هاكون عضو ف جماعتك
ولا طربوش متعلِّق على شماعتك
ولا هابوس أيد (الحجاج) بتاعك
ما أنا فاهم خداعك
وكلمتى من سيطى
وكرامتى تاج على حيطى
وأعرف أخطِّى لفين
وأتصاحب مع مين
وبأوزن الكلمة
وبأعشق ريحة العلم
مش زى ناس
عاشوا كما الخرفان
وهايموتوا زى الغنم !!!!
تقفل محكمة
تخوِّف الإعلام
بكرة هايدور الزمن
وهاتواجه الإعدام!!
هاتحط اسمى فى قوايمك السودة
هافتح صدرى لكلابك السعرانة
يا شيطان فى شكل ملاك
يا سلعوَّة سعرانة
ع تنهش براءة الطفولة
ترعب بنات الناس
تتلذذ بشرب الدم
تطعن من ورا
تضحك لما الدم ينقِّط من إيديك فى الضرا
ولما ننعى الطفولة
راحت فين الرحمة؟
ياللى رضيت تكون
أمنا الغولة !!!
لا فى الشتا جلابيتك هاتدفينا
ولا فى الصيف هاتضلل علينا
ياكداب
يا مخادع
خلاص عرفنا إنك جاى تنصب باسم الدين علينا
ف أقلّع وش البراءة
وأكشف رغبتك فى الدم
ياللى ماعندك دم
أنا مش هاكل الصخر تانى
ولا هاسيب ولدى يعانى
ولا هاكون لمرشدك مملوك
ولا هانسيب بناتنا جوارى ليك
ياللى نسيت
إن العاهرة بس
هى اللى بتقلب الحقايق
واللى فيها
تجيبه فيك!!!

“باطل .. ف أوعوا تزيَِّنوه”
(1)
اللى أساسه من البدايـــــة كان باطل
ماتتعبش نفســــك ، وتزخرفه زخريف..
وسيبه يعجن ، ويعـــــــــــــك ، ويماطل
كده أو كده ، بعد الصَّهد ع يجى خريف!!
(2)
أزاى رئيس ؟! وأزاى تحشـــــــد أنصارك؟!
وأزاى تحاصر العدل ، وتكمم الأفـــــــواه؟!
لو عجبتك قوى فاشيـــــــــــــة القذافى
بص ف نهايته، وسيبك م العنـــــاد إياه!!
(3)
من غزوة الصَّناديق للدَّم ف الاتحادية
استشهد شباب كله وفا ، وطيــــــــابة..
ياللى ع تنادى بشريعــــــــــة إسلامية
وع تقول البقاء للأقــــــــــــــــــــــــــــوى
هوَّ أنت ع تحكم بلد، ولا ع تحكم غابة؟!
(4)
ع تخوِّف النَّاس بالجوع ، وأنت اللى هاتجوِّعهم
لا سياحة جاية عشــانك ، ولا داويت أوجاعهم
عمَّال ع تضحك عليهم مستغل الطيـــــــــــــبة
بكرة يفوقوا وساعتها قولى : أزاى هاترجَّعهم؟!
(5)
اللى جه متأخْر، واللى قـــــال ع الثَّــــــــــــورة حرام
ليه دلوقتى عاملى عنــــتر، وليه نحتُّوا له أصنام؟!
وليه تسيبوه يعمل الدين سبُّوبة ، وماتقولوشى حرام
وليه علناً يعملوا أحرار، وسراً يركعوا لأى نظـــام؟!
(6)
غلا السماد ، والمُيِّة ، وزوَّد الدِّينـــــــة
وطرمخ على اللى قتلوا ولادنا فى سينا
وروا أسفلت الشُّــــــــــــــــــــــوارع دم
ولسه يا صعيد يا حُر ، مش دارى بينا !!!

 

 

 

 

 

 

اليوم السابع