س وج ليه بيرفضوا مشروع الدستور .. علشان عاوزين حقهم في الصحة والعلاج
- س : هي إيه أصلاً مادة الصحة في مشروع الدستور اللي عاوزينا نستفتي عليه ؟
- ج : هقولك هي مادة 62 ، الرعاية الصحية حق لكل مواطن تُخصص له الدولة نسبة كافية من الناتج القومي و
- س : إستنى ودي فيها إيه ماهو كلام كويس أهو ؟
- ج : لا مش كلام كويس ولا حاجة ، نسبة كافية دي كلمة عايمة بتتفسر زي ما يشوف فكر الدولة لو شايفة صحة الناس عندهم مهمة هتبقى نسبة عالية والعكس ، إحنا عاوزين تبقى نسبة محددة على الأقل 15 % من الموازنة زي ما مصر موقعة على إتفاقية أبوجا سنة 2001 زي باقي الدول المهتمة بصحة مواطنيها ، علشان يتصرف على المستشفيات الحكومية كويس وتقدر تلاقي علاج حقيقي مش تشتري كل حاجة على حسابك وتفضل المستشفيات خرابات زي حالها دلوقتي .
- س : طيب ما هو مفيش فلوس في البلد والدنيا واقفة ؟
- ج : إحنا بنقول نسبة مش مبلغ ، يعني زي ما تكون الموازنة تكون نسبة منها ، مثلاً لو أنت دخلك في الشهر 1000 جنيه هتشيل نسبة أد إيه لعلاج أسرتك ، 15% منهم يعني 150 جنيه ولو 2000 هيبقى 300 جنيه .. ده كتير !؟
- س : لا .. طيب كمل مادة الصحة
- ج : وتلتزم الدولة بتوفير خدمات الرعاية الصحية والتأمين الصحي وفق نظام عادل عالي الجودة ويكون ذلك بالمجان لغير القادرين و
- س : إستنى بقى .. ودي فيها ايه ، مهو كلام زي الفل ؟
- ج : أقولك فيها ايه ، فيها أن الدولة مش بتلتزم بتوفير وتقديم خدمات الرعاية الصحية والعلاج ، ومش موضحة إذا كان التأمين الصحي ده إجتماعي شامل ولا تجاري زي قانون التأمين الصحي بتاع حكومة مبارك ، يعني كلام عايم ، وبعدين هم مين الغير قادرين اللي قال عليهم دول ، تعرف أنه قبل كده عرفوهم في مشروع قانون التأمين الصحي سابق أن الغير قادر هو مستحق معاش الضمان الأجتماعي اللي هو 70 جنيه .. يعني اللي دخله 500 جنيه يعتبر قادر ويتحمل تكاليف علاجه .
- س : إممم .. بصراحة مش فاهم
- ج : عندك حق ، بص مش المفروض أنه يبقى نظام العلاج موحد على كل الناس لأننا كلنا بني أدمين ومينفعش واحد يتعالج بالكامل وواحد يتعالج بالقطعة ، يبقى لازم الدولة تلتزم بتقديم كل الخدمات العلاجية في كل الأمراض بنظام تأمين صحي إجتماعي شامل لكل الناس بإشتراك ثابت على الكل مش أدفع إشتراك ويقولي بعد كده لما أتعب لازم أدفع نسبة من تكاليف الأشعة والتحاليل والعمليات علشان مكلفة ، وكمان لازم يتحط تعريف لغير القادرين اللي ميدفعوش الأشتراك ده .
- س : كلامك كويس ، كمل مادة الصحة في مشروع الدستور
- ج : وتلتزم جميع المنشأت الصحية بتقديم العلاج بأشكاله المختلفة لكل مواطن في حالات الطؤاري أو الخطر على الحياة و
- س : اييييييييه ، يا عم روق ، بجد برافو عليهم .. فيها إيه دي يا مفتري
- ج : فيها إن لما واحد بعد الشر يعمل حادثة ويروح المستشفى الحكومي ولا الخاص يقولوله ( ده لو كان واعي أصلاً ) عاوزين الفزيتا وتأمين كام ألف علشان العلاج والعملية وغيره ، واللي مش معاه يستلف ، يا راجل ده حالياً قبل مشروع الدستور ده موجود قرار وزاري بيلزم المستشفيات الخاصة أنها تستقبل حالات الطؤاري والحوادث ببلاش أول 24 ساعة ومش بينفذوه ، فما بالك لما ميتقالش بالمجان في الدستور
- س : يا نهاااااار ، إنت هتجنني .. فيه حاجة تاني باقية ؟
- ج : سلامتك من الجنون ، أنا بفهمك بس ، أخر حاجة هي : وتشرف الدولة على كافة المنشأت الصحية وتتحقق من جودة خدماتها وتراقب جميع المواد والمنتجات ووسائل الرعاية المتصلة بالصحة وتصدر التشريعات وتتخذ كافة التدابير التي تحقق هذه الرقابة … ده أخر كلام عن الصحة .
- س : بصراحة ختامها مسك ، ولا كمان مش عاوزهم يراقبوا ويتحققوا يا عم الفيلسوف ؟
- ج : مسك إيه يا صاحبي ، أنا عاوزهم يراقبوا كويس ، بس ينفع اللي صاحب المنشأة هو اللي يراقب على نفسه بس ، ينفع الدولة اللي تراقب على نفسها بس ، إذا كان دلوقتي وبعض المنظمات بتاعة حقوق الأنسان بتراقب والوضع في المستشفيات لا يسر عدو ولا حبيب ، ليه ميقولوش منظمات حقوق الإنسان والمجتمع المدني والنقابات المهنية تراقب كمان .
- س : طيب ليه بدل الدوشة دي ما يكتبوش مثلاً :( الرعاية الصحية حق ل
- كل مواطن ، تُخصص لها الدولة نسبة لا تقل عن 15% الناتج طبقاً للمعايير الدولية ، وتلتزم الدولة بتوفير كافة خدمات الرعاية الصحية والتأمين الصحي للمواطن طبقاً لقانون تأمين صحي إجتماعي عادل وشامل لجميع فئات المجتمع ولجميع الخدمات الصحية بكافة أشكالها مقابل إشتراك مُحدد يراعي فيه دخل المواطن ، ويكون ذلك بالمجان للذي يقل دخله عن الحد الأدنى للأجر الذي يُحدده القانون ، وتلتزم جميع المنشأت الصحية بتقديم العلاج بأشكاله المختلفة لكل مواطن في حالات الطؤاري أو الخطر على الحياه مجاناً ، وتشرف الدولة على كافة المنشأت الصحية وتتحقق الدولة ومنظمات المجتمع المدني وحقوق الأنسان والنقابات المهنية المعنية بالصحة من جودة الخدمات الصحية المقدمة كما تراقب جميع المواد والمنتجات ووسائل الرعاية المتصلة بالصحة ، وتصدر الدولة التشريعات وتتخذ كافة التدابير التي تحقق هذه الرقابة ) … إيه رأيك كده يا عم يبقى تمام ؟
- س : طيب مش كنتم بعتولهم قولتلهم كده بدل ما انتم بتهاجموا وخلاص ؟
- ج : وحياتك بعتنا وخطبنا وهللنا ، ولا حد سمع حاجة
- س : لا طبعاً لازم يسمعوا ، إحنا مش قمنا بثورة علشان محدش يسمعنا وتضيع حقوقنا ، أنا هقول معاك وهيسمعوا
- ج : أيوه ، لازم نقول ونهتف مع بعض ( علشان العيش والحرية والعدالة الأجتماعية .. بنرفض الدستور اللي وضعته التأسيسية )
لجنة حق المواطن في الصحة والتعليم
