بحبها حب كبير وأبوها خطبها لواحد تاني

 

 

السلام عليكم ورحمة الله وبركاته.. أحب أشكركم على المجهود الكبير اللي بتقوموا بيه.. وربنا يجازيكم خير على ما تقوموا به من مجهود كبير وتحقيق راحة نفسية كبيرة لنا.

أنا هادخل في الموضوع على طول.. أنا بحب إنسانة بقالي سنتين وشوية، وبنعشق بعض والله جامد جدا لأبعد حد.. الحمد لله إني أحسنت الاختيار، وبصراحة أنا متأكّد إني لو لفّيت الدنيا كلها مش هالاقي بنت تحبّني كده وتكون مخلصة ليّ بالطريقة دي.. ده شيء عظيم أوي إنك تلاقي بنت زيّها محترمة جدا وخلوقة جدا ولبسها محترم جدا ومن أسرة كويسة أخلاقيا واجتماعيا واقتصاديا ودينيا.. تبارك الله.

المهم.. البنت دي أنا مستعد لأي شيء علشان تكون ليّ.. أنا يا جماعة مش عايز غيرها.. المهم هي من شهر وبيتقدّم لها عرسان فتقدّم لها دكتور ووالدها وافق موافقة مبدئية من غير ما يقول لحد الكلام ده من شهر ونص، ومن أسبوع ونص كده والدها قال لها فلان اتقدّم لك، وأنا موافق وهو -مع الأسف- لم يأخذ رأيها.

فهي قالت لي فبعت رجل محترم صديق لوالدي وهو على معرفة بوالد البنت واتكلموا سوا، والراجل ماكانش رافض ولا موافق، بس كان فيه ترحيب بعض الشيء، ولما قابلت والد البنت كلّمته واترجيته بأدب واحترام وقبّلت رأسه، وقلت له أرجو إن بنت حضرتك تكون من نصيبي.

المهم.. الراجل قال لي إن شاء الله خير وكلام زي الفل.. قال لي هنتقابل بعد بكره في الصيدلية بتاعته أنا وهو وصديق والدي.. المهم لمّا هو روّح البيت قال لهم فلان اتقدّم وكده.. أنا فهمت من البنت إنه مرحب بيّ، بس قال هو ولد كويس ومحترم وقاعد يشكر فيّ، بس أنا أعطيت كلمة للدكتور اللي اتقدّم وخلاص على كده.

واتصل بالدكتور اللي كان اتقدّم لبنته، وقال له اقرأ الفاتحة علشان العرسان كتير.. المهم ما علينا.. البنت اتخطبت من غير رضاها والله إني في أشد الزعل، وهي ربنا يصبرها أنا عمري ما شفت حد بيحب كده.. ومخلص كده.

على فكرة هي مش زي بنات اليومين دول المايعين أو اللي بيبكوا كده وخلاص.. أرجو أن تكونوا فاهمين قصدي.. المهم أنا باقول لها إن فيه أمل إن شاء الله مهما كان ولازم تكرهيه فيكي ونحاول مرة واتنين ومليون.. هي كلمته وقالت له لو سمحت أنا بحب واحد تاني ومش عايزاك.. وهو رفض بردضه يسيبها.. المهم هي كلمته بأسلوب محترم وأسلوب شديد اللهجة وبرضه مش نافع، وهو بيقول لها أنا مش هاسيبك برضه.

أنا دلوقتي عايز حل أرجوكم للموضوع ده بأي طريقة.. قولوا لي أعمل إيه علشان تكون ليّ وإزاي تعرف تخلّيه يسيبها.. هو عنده 27 سنة كده وشاب المفروض يكون محترم، بس هو بيحبها وكان كلمها وقال لها عايز أخطبك قالت له أنا مرتبطة بواحد تاني.. فهو أخد الموضوع عِند وراح لأبوها وقرأ فاتحتها.

بالله عليكم تقولوا حلول مش حل واحد.. هي مش عايزاه وعايزاني أنا.. بالله عليكم قولوا لي أعمل إيه.. وشكرا جزيلا وربنا يبارك فيكم، وآسف على الإطالة.. السلام عليكم.

 

بص وطل