أومــــليـــت البـــــيـــتــــزا

النهارده هنقدّم لك أكلة سهلة وخفيفة، ممكن تقدّميها لعيلتك في الفطار أو العشاء، وهي أومليت البيتزا على طريقة “سفرة دايمة”.

أومليت البيتزا
المقادير:
8 بيضة
½ ملعقة صغيرة بيكنج بودر
¼  كوب بقدونس مفروم
2 ثمرة طماطم متوسّطة
½ كوب فلفل ألوان
¼ كوب زيتون مخلي
2 ملعقة كبيرة دقيق
بصلة مقطّعة صغير
ملعقة صغيرة فلفل
ملعقة صغيرة ملح
¼ ملعقة دقيق
¼ ملعقة زعتر
ملعقة زبدة

الطريقة:
1- قطّعي الطماطم مكعبات صغيرة، وشيلي منها قلبها الطري، وحطّيها على الفلفل والبقدونس والبصل والزيتون، وسيبيهم على جنب.

2- اضربي البيض في المضرب كويس، وحطّي عليه ملعقتين الدقيق والبيكنج بودر والملح والفلفل والزعتر، مع التقليب.

3- هاتي صينية وادهنيها بالزبدة، وحطّي عليها ربع ملعقة دقيق علشان تكوّن طبقة رقيقة، ضيفي البيض على الخضراوات وقلّبيهم بالمعلقة وحطّيهم في الصينية.

4- دخّلي الصينية الفرن وسيبيها مش أقل من ربع ساعة لحد ما وشّها يحمر، خرّجيها وسيبيها تهدى وقطّعيها مثلثات وقدّميها باردة.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،

بص وطل