العيشة بقت بطاطا

هايدى دياب

استفزتنى حالة إنسانية .. قولت أكتب عنها فى أغنية
يمكن لما العالم يسمعها .. يتعاطف معها شوية
الحالة اللى معانا يا سادة .. عن شعب بقسوة انجرح
ودمعه أصبح عادة .. ونسى طعم الفرح
فى زحمة اسمها أحزاب .. وكراسى وسلطة عليا
خلوا الحياة اكتئاب .. وبقى طعم البامية فاصوليا
وكلام كتير يتقال .. واعتراضك مش مسموح
والشعب لهمه شال .. واللى عند الحكومة بيروح
حصرياً والعرض سارى .. والكميه مش محدوده
مافيش ولا شخص غالى .. وكل مواصفاتك موجوده
الشعب هينزل فى مزاد .. حاجه قديمه روبابيكيا سكسونيا
راجل ومراته وسبع أولاد .. بطاسة او حله المونيا
شوف المواطن مهو أصله رخيص .. ومحدش فى بلده غلاه
ده اللى يموت بيموت فطيس .. وقلة أحسن فى الحياة
ودى كانت حالتنا يا سادة .. مش محتاجه توضيح واستفاضه
ده خلوها خل بزيدة .. والعيشة بقت بطاطا
وأنا هفضل أتكلم وأقول .. ومش هبطل لماضة