فوق من اللى انت فيه

اوعى تفتكر انك عشان نزلتلى مرة و واخد فى ايديك علمك و ليزرك و مشيك نفسك و واخد فى ايدك مراتك و عيالك و قال ايه نازل تثور قدام الاتحاديه تبقا ثائر !
ده انت يا حيله ثائر يومين , تعرف ريحة الغاز ؟ هدومك اتلسعت من الخرطوش ؟ اديك اتلطخت بدم صحابك ؟ ……………………..……
و انت اوعى تفتكر عشان نزلتلى و اعتصمتلى شهر و نازل واخد علمك فى ايدك و الصوره اياها تحت باطك و شارتك على قورتك و واخد فى ايدك مراتك و عيالك و قال ايه نازل تحمى الشرعيه فى رابعه !
انهى ثوره ديه اللى تقوم لجل شخص ! ؟
انت و هو :
كنتم فين من 3 سنين ؟ كنتم فين و احنا بنموت فى مسبيروا و محمد محمود و مجلس الوزراء ؟ كنتم فين و احنا نيمين على الرصيف و بيشحتوا من بعض السجاير ؟
انت حزب كنبه و فلول ……………………..…. و هو تكفيرى و متشدد
انت قولت عليه ممول و قابض …………………. و هو قال عليه كافر و فاسق
انت منزلتش غير من خوفك من فزاعه الاسلاميين ……………
و هو منزلش غير خاف من فزاعه العلمانيين
انت و هو حليتوا دمى فى الميادين و انا بموت لجل الحريه
انت و هو جريتوا على المجالس و الانتخابات و انا بموت فى الشوارع
انا اللى مفارقتش الشارع من 3 سنين .. انا اللى صوتى راح و انا بنادى حريه
انا اللى شايل صحبى و دمه سايل .. انا اللى نازل و مش راجع
انا اللى دافع الدم و شايل الهم و انت اللى اكل شارب نايم …. ولا تتلم
انا الساعى لجل حريتى …. و انت اللاهث خلف الكرسى
انا الثوره انت مين ؟؟!!