أديب عن «خناقة شوبير والطيب»

 

 

علّق الإعلامي عمرو أديب، اليوم الأحد، على المشاجرة التي وقعت بين الكابتن أحمد شوبير، والمعلق الرياضي أحمد الطيب، خلال لقائهما مع الإعلامي وائل الإبراشي، ببرنامج «العاشرة مساءً»، عبر فضائية «دريم»؛ قائلًا: «أنا في غنى عن إني أقول إن اللي حصل غلط وبتاع، لكن أنا عايز أقول إننا كلنا على الحافة، البلد كلها بالحكومة والمؤسسات، عند نقطة الانكسار والانهيار».

وأضاف أديب، خلال تقديمه برنامج «القاهرة اليوم»، عبر قناة «اليوم»، «إحنا يا جماعة بني آدمين، إحنا بنتعب، إحنا شعب وأمة تحت ضغط، شوبير امبارح مثلًا كان ممكن يكون في وضع أهدى من كده، لكن إحنا كلنا روحنا في مناخيرنا، لأننا قاعدين نشيل من 2011، حالة من التراجع في كل شيء وارتفاع الأسعار وسوء أوضاع اقتصادية، إحنا كلنا تحت ضغط كبير جدًا، كلنا ممكن نوصل للمرحلة دي، وهي بالتأكيد مرحلة متدهورة».

وتابع: «المواطن المصري، ومنه الإعلامي، بيتحمل كتير، أحمد الطيب وشوبير عوروا بعض امبارح، دول النخبة، قعدوا يضربوا بعض 10 دقائق كاملة، الإبراشي هو كمان كل ليلة نفس الوضع ده، كل ليلة في خناق عنده، إحنا حكامنا وحكوماتنا بهدلتنا، ما أقدرش أفصل بين اللي حصل بين شوبير والطيب واللي حصل في أبو قرقاص في المنيا، كلنا في ضغط رهيب بسبب الظروف المنيلة».

واستكمل: «لازم نستوعب بعض أكتر، إحنا محتاجين كلنا الدكتور أحمد عكاشة يعالجنا، محدش يقولي على اللي حصل على الهواء ده انفلات، أه انفلات، بس البلد كلها في انفلات مش هما لوحدهم، البلد مش بتركز ومش بتهدى خالص، إحنا شعب تعبان ومرهق فعلًا وأعصابنا على الحافة».

التحرير