من كل بستان «أنا المصرى 2»

بَنِتْها من الهرم للسدّ يدِّى

وأَبنى مِيَّه غيرهم فى التحدّى

وكنت زعيم عظيم ما بين جيفارا

وتيتو وكاسترو ونهرو وغاندى

ومش محتاج أقول أنا كنت مين

أنا المصرى كريم العنصرين!!

■ ■ ■

زمان كان فيه مَلِك فاحِت روايحُه

وثوار جيش بروحهم يومها ضحُّوا

وكان لينا شأنْ.. حتى فى الهزيمة

وطن كان لو ظَلَم قلبك يسامحه

عَلينا عين.. وباقى الأمة عين..

أنا المصرى كريم العنصرين!!

■ ■ ■

وكنت أخطُب تِصيِب الدنيا ربْكة

ومن «لبنان» يعود أسطول «أميركا»

وليّا فى الأمم كِلمه ومكانَه

وإخوة فى النضال: دمعه وضحكه

ورقابينا الأبيّة.. مرفوعين

أنا المصرى.. كريم العنصرين!!

■ ■ ■

وعاد تانى الملك يحكم بلادُه

ومن بعد السنين دى زاد فسادُه

وكنّا سادَه فوق أرض الكِنَانَة

وأصبحنا عبيدُه.. أو عِبادُه

وضاع فى الزحمة إنجاز السنين..

أنا المصرى.. كريم العُنصرين!!

■ ■ ■

التحرير