للبنات.. 10 طرق لمواجهة التحرش
“كنت ماشية في الشارع، جريمتي الوحيدة إن من مكان شُغلي للمترو لازم أمشي 15 دقيقة. النهاردة اتعرّضت للتحرش 10 مرّات في المسافة دي، مش علشان لبسي أو شكلي.. لكن علشان المُجتمع موافق ينتهكني ويبرر ده”.
شكوي زميلتنا سارة، حملناها إلى “بنات جدعة”، بيعرفوا يتصرفوا ازاي لو اتعرضوا لتحرش. سألنا كمان عن رأي القانون، مع مصطفى محمود المحامي بمؤسسة نظرة للدارسات النسوية. وكمان سألنا أمل فهمي العضوة المؤسسة بمبادرة “خريطة التحرش”، عشان نقدر نحط كتالوج نستخدمه لو أي واحدة فينا اتعرضت لتحرش.
10 سيناريوهات لمواجهة المتحرشين
– لو حد قالك كلمة “مش لطيفة”. بلاش تتجاهلي الموقف وتعديه.
– ممكن تردي على “المتحرش” بأنك تزعقي وده للفت انتباه الناس ولخلق نوع من المسئولية المجتمعية.
– اتكلمي عن اللي حصلك مع كل المحيطين بيكي، واكتبي على فيس بوك وتويتر، عشان الناس تعرف حجم المشكلة وإنها بتحصل لكل الستات والبنات اللي حواليهم.
– ابعدي عن الطرق العنيفة وأنت بتردي على “المتحرش” عشان تقدري تتجاوزي الموقف بأقل الخسائر.
– الأدوات العنيفة زي “الالكتريك شوك” وهو جهاز بيكهرب أي حد لو لمسه يعتبر جريمة يعاقب عليها القانون.
– حاولي وقت لما تتعرضي لتحرش أنك تشرحي للناس في الشارع اللي حصلك بالتفصيل لكسب تعاطفهم من خلال شرحك لقدر الانتهاك والإهانة.
– حاولي تستعيني بالستات المحيطين بيكي لو قلقانة.
– لو واقعة التحرش مأثرة عليكي ومحتاجة دعم نفسي، متتردديش في أنك تتواصلي مع الأماكن المهتمة بده زي مؤسسة نظرة للدارسات النسوية ودي صفحتهم: https://www.facebook.com/Nazra.for.Feminist.Studies
طب لو حادثة التحرش وصلت لدرجة أن حد لمس جسمك أو أكتر من كده، وقتها على طول تحفظي على المتحرش واتصلي بالشرطة تجيلك، أو اعملي بلاغ في أقرب قسم بوليس منك، بس خدي بالك من أنك تاخدي معاك المتحرش، أو يكون معاك شاهد على واقعة التحرش وقت حصولها، أو يكون معاك معلومات واضحة عن “المتحرش” عشان البلاغ يكمل وميتحفظش.
ادعمي غيرك بأنك تقولي اللي حصلك، متخافيش وحاولي توصلي صوتك على الانترنت ولمبادرات مثل “خريطة التحرش” اللي هتستقبل بلاغك بمكان التحرش ويكون نقطة حمراء في خريطتها، تقولّنا الأماكن اللي فيها تحرش، وده من خلال رسالةsms على الرقم 6069 وهترد عليكي برسالة فيها أرقام هتدعمك قانونيًا ونفسيًا.
القانون بيقول أيه عن التحرش؟
المادة 306 مكرر (أ) من قانون العقوبات المصري: يعاقب بالحبس مدة لا تقل عن ستة أشهر وبغرامة لا تقل عن ثلاثة آلاف جنيه ولا تزيد على خمسة آلاف جنيه أو بإحدى هاتين العقوبتين كل من تعرض للغير في مكان عام أو خاص أو مطروق بإتيان أمور أو إيحاءات أو تلميحات جنسية أو إباحية سواء بالإشارة أو بالقول أو بالفعل بأية وسيلة بما في ذلك وسائل الاتصالات السلكية أو اللاسلكية.
وتكون العقوبة الحبس مدة لا تقل عن سنة وبغرامة لا تقل عن خمسة آلاف جنيه ولا تزيد على عشرة آلاف جنيها و بإحدى هاتين العقوبتين إذا تكرر الفعل من الجاني من خلال الملاحقة والتتبع للمجني عليه.
وفي حالة العودة تضاعف عقوبتا الحبس والغرامة في حديهما الأدنى والأقصى.
المادة 306 مكرر (ب): يعد تحرشا جنسيا إذا ارتكبت الجريمة المنصوص عليها في المادة 306 مكرر (أ) من هذا القانون بقصد حصول الجاني من المجني عليه على منفعة ذات طبيعة جنسية، ويعاقب الجاني بالحبس مدة لا تقل عن سنة وبغرامة لا تقل عن عشرة آلاف جنيه ولا تزيد على عشرين ألف جنيه أو بإحدى هاتين العقوبتين.
فإذا كان الجاني ممن نص عليهم في الفقرة الثانية من المادة (267) من هذا القانون أو كانت له سلطة وظيفية أو أسرية أو دراسية على المجني عليه أو مارس عليه أي ضغط تسمح له الظروف بممارسته عليه أو ارتكبت الجريمة من شخصين فأكثر أو كان أحدهم على الأقل يحمل سلاحا تكون العقوبة الحبس مدة لا تقل عن سنتين ولا تجاوز خمس سنين والغرامة لا تقل عن عشرين ألف جنيه ولا تزيد على خمسين ألف جنيه.
تعليقا على القانون
مصطفى محمود المحامي بمؤسسة نظرة للدارسات النسوية، قال إن الجديد في تعديل قانون التحرش إن نوع الضحية مش متحدد “وده يعتبر شيء جيد”، إلا إنه أضاف أن المادة 306 مكرر (ب) واللي تم اضافتها مؤخرا على القانون، فيها اشكالية وتحديدا في جملة “منفعة ذات طبيعة جنسية” لأنه ربط بين واقعة التحرش وبين رغبة الجاني في تحقيق منفعة جنسية، لأنه في أغلب الوقت بيكون مقصود من التحرش مش تحقيق منفعة جنسية ولكن إذلال الضحية أو التحقير منها وده بيسبب ضرر أدبي ونفسي”.
الشروق
