مصرية عائدة من اليمن: جيش الهند أنقذنا
روت علياء جابر، المصرية العائدة من اليمن، تفاصيل إنقاذها من قبل قوات الجيش الهندي وإعادتها إلى مصر، قائلة: “رجال القوات المسلحة الهندية هم رجال أقوياء”.
وأضافت جابر، عبر صفحتها الشخصية على موقع التواصل الاجتماعي “فيس بوك”، أن سبب ما جعلها تعيش حتى الآن هو الجيش الهندي بعد إرادة الله سبحانه وتعالى، موضحة أن الهند هي من أرسلت سفينة حربية للمرة الثانية لإجلاء رعاياها من دولة اليمن، مشيرة إلى أن دولة الهند اتخذت قرارًا إنسانيًا سيكتب في تاريخها بإنقاذها للجنسيات الأخرى بدون أي تفرقة.
وتابعت جابر، قائلة: “الجيش الهندي نقلنا للسفينة ونزلنا الغرف اللي المفروض الجيش ينام فيها ونيمونا إحنا مكانهم وفضلوا هما صاحيين يقدمولنا خدمة فايف ستارز بلس، وجابولنا عشاء وعصائر ولبن وأدوية ودكاترة للناس التعبانة لحد ما ننام.. وبعد ما صحينا جابولنا فطار وفضلوا يخدمونا لحد ما نزلنا من السفينة”.
وأشارت إلى أنه استقبلهم وفد من السفارة المصرية في جيبوتي في وجود السفير، قائلة: “خلصولنا كل الإجراءات وقالولنا إحنا مرتبين ليكوا كل حاجة لحد ما ترجعوا مصر، وقعدنا يوم في الأوتيل، وتاني يوم سافرنا.. بس قبل ما نسافر بقى، السفارة مضتنا على إقرار إننا لما نرجع مصر ندفع فلوس التذاكر اللي مصر دفعتهالنا”.
وتساءلت المصرية العائدة من اليمن، قائلة: “بس ليه الهند هي اللي تنقذنا من الخطر وتسفرنا معاها وتأكلنا وتنيمنا وتعالجنا وكل ده من غير ولا مليم.. ومصر اللي هيا أمي تمضينا على إقرار نرجع الفلوس اللي دفعوهلنا؟؟”، مضيفة: “إحنا سافرنا من جيبوتي لإثيوبيا ومن إثيوبيا لمصر وهنا بقى مصر استقبلتنا وأول ما وصلنا المطار كانوا مقدرين قد إيه إحنا متمرمطين بقالنا أسابيع.. فمباحث المطار أخدت باسبورتنا وقعدونا ساعة ونص وبعدين مشونا”.
وختمت علياء، قائلة: “شكرًا لوزارة الخارجية اللي كانت بتطمن عليا طول الوقت وحاولت تساعد بس معرفتش.. شكرًا للسفارة اللي استقبلتنا في جيبوتي.. شكر أكبر لكل الناس اللي حاولت تساعد.. وأي شكر ما يكفيش للدولة المحترمة اللي كنا بنتريق عليها اللي اسمها الهند”.
الوطن
