غضب في أسوان

 

 

شهدت منطقة قسم ثان أسوان، حالة من الغضب من مسؤولي المحافظة وشركة مياه الشرب والصرف الصحي، عقب انقطاع مياه الشرب عن الشلال والصداقة القديمة والصداقة الجديدة وكيما والسيل، لمدة يوم كامل بدأ من فجر أمس وانتهى فجر اليوم، بسبب حدوث كسر بماسورة مياه شرب عمومية بمنطقة السيل بطريق (السيل – كيما)، ما أدى إلى قطع المياه.

وطالب الأهالي بضرورة وجود محابس رئيسية قريبة من مكان كسر الماسورة، واتهموا شركة مياه الشرب بالتقصير في عملها، ولجأ بعض الأهالي للتيمم لأداء الصلوات في المساجد، وملئ الجراكن والجرادل من نهر النيل مباشرة.

يقول إيهاب البصري، أحد أهالي المنطقة لـ”الوطن”: “يعني إيه مسؤول في شركة المياه ميردش علينا؟، وليه الماسورة تتكسر في منطقة وتتقطع المياه عن مناطق أخرى، رغم أنها بعيد عنها 5 كيلو متر تقريبا، ده يرضي مين، اتصلنا بكل المسؤولين في شركة المياه والمحافظة، في منهم مردش علينا خالص، ومنهم اللي رد وقعد يصبرنا على ذنب احنا ملناش دعوة بيه، والمشكلة ان الماسورة وخط المياه بيتكسر كل أسبوع، والتاني يضرب في نفس المنطقة وتتقطع المياه عننا كلنا، يعني هي شركة المياه فقيرة مش قادرة تحط محابس مياه لكل منطقة وبتقطع المياه من الشال للسيل”.

وأضاف البصري، “والله احنا زهقنا من العيشة في هنا وهنضطر ندور على مكان تاني، ويمكن تكون بلد تانية، عشان المسؤولين مبيهتموش بينا، وكل همهم بس فواتير المياه العالية، وأنا من النهاردة مش هدفع فواتير إلا لما الحال يتعدل، يعني عيد ربنا مش عارفين نستريح فيه، احنا بنطالب المهندس شريف إسماعيل رئيس الوزراء، يبص لأسوان شوية ولحال شركة المياه، واللي كأنها بتطلع لسانها لينا كل يوم ولسان حالها مفيش إصلاح”.

وقال يسري محمد عبدالله، من أهالي المرشح شرق: “مرفق مياه الشرب والصرف الصحي في أسوان، يحتاج وقفة حازمة وحاسمة، يعني إيه ماسورة مياه تتكسر نقعد أكتر من 24 ساعة عشان نصلحها وفي أيام عيد، لا مش كده وبس، وعيد أضحى، يعني الناس محتاجة المياه أكتر من أي وقت، بعد ذبح الأضاحي، للأسف الشديد أسوان أصبحت مستنقع كبير من مياه الصرف الصحي، مفيش شارع إلا وفيه ماسورة مياه مكسورة أو مجاري طافحة، المفروض من كتر المواسير اللي انكسرت يبقى عندنا خبرة وسرعة في التعامل، أنا بس بسأل هي باقي المحافظات بتعاني زينا ولا أسوان بس هي اللي انكتب عليها تبقى كده، ده احنا حتى ملحقناش نفرح لما قالوا لنا إنه هيتم وقف الصرف الصحي في مياه النيل أول سبتمبر، واللي محصلش وضحكوا علينا، على رأي المثل قليل البخت يلاقي العضم في الكرشة، وهو ده العيد في أسوان، وحسبنا الله في أي مسؤول مقصر في عمله”.

وأكد اللواء حسن عبدالغني رئيس شركة المياه، أن السبب وراء قطع المياه، خط المياه العمومي 12 بوصة، وتم إصلاحه، وهو أحد الخطوط الرئيسية، وتكرر الكسر أكثر من مرة فيه بمناطق مختلفة بطول الخط، يكون بسبب مرور سيارات النقل الثقيل، التي تحمل فوق قدرتها في هذا الطريق، وبمجرد وصولنا بلاغ بكسر خط المياه، بدأت فرق الصيانة التابعة للشركة إصلاحه.

الوطن