م الآخر| فرصة لعظيم.. أوطان للإيجار

 

لا تدع الفرصه تفوتك.. لدينا عدد كبير من الأوطان للإيجار، تناسب كل الأغراض، وتصلح لكافة الأنشطة، وبأسعار خيالية، واستمتع بالحياة في العالم العربي، وإليك قائمة بالأوطان المتاحة للإيجار

 

– العراق.. تناسب كافة الأغراض، سكنها الأمريكان منذ سنوات، تتميز بالطقس المعتدل والمكان الاستراتيجي، والقرب من إيران؛ لسهولة مراقبتها، وثروات وبترول وزراعة، و”حاجة أبهه علي الأخر”، وكمان واجهة بحرية علي الخليج، وفلوسه وعباياته وبتروله، وبها 3 غرف (كردية، سنية، شيعية)، ويمكن استخدام كل غرفه لغرض علي حدي.

شعبها يائس، كاره لوطنه، يمكن إجلاءه في أي وقت، جيشها لا خوف منه، فمع أول دانة مدفع يسلم مهامه وسلاحه و”يخلع”!، وبها حاليا ساكن جديد يدعي داعش، ولكنه ساكن ترانزيت لن يستمر بها كثيرا، جاء ينهبها، ويمكن ترضيته بحفنة من الدولارات وسيخرج منها، والمسئول عنها طائفي متطرف سيده الأمريكي يقول له: “سيب، هيسيب علي طول”

 

– ليبيا.. موقع استراتيجي لعظيم أوروبي، تطل علي البحر المتوسط، واجهة بحرية والواجهة القبلية مدخل أفريقيا، مساحة كبيرة، تصلح لجميع الاغراض واللي فيها مجرد ميليشيات وشوية عقول “بور” من عينه القذافي، يمكن إيجارها بسعر خيالي “كام طلعه جويه من حلف الناتو”، والأمر يستقر، اسرع قبل أن تفوت الفرصة، ويطمع فيها أمريكان أو دويلة عربية بغطره وعقال.

 

– سوريا.. فرصة لن تتكرر وطن علي “المحارة” هتستلمه “محارة وحلوق” ولا دولة ولا بنية أساسية ولا شعب ولا حاجه خالص، ووضبه إنت علي راحتك، لكن الطامعون فيها كتير، إيران وحزب الله والسعودية وداعش والجيش الحر والجيش اللي مش حر وروسيا وتركيا وغيرهم، وصاحبه عاوز يخلص منه بأسرع وقت لدواعي السفر علشان عنده عقد عمل في إيران، “أصله طبيب”.

 

– اليمن.. عرض علي قده لكن ما يمنعش إنه في مكان استراتيجي، فهي لها شباك علي طريق التجارة العالمي، ويمكن التحكم في تجارة الشرق والغرب من هذا الوطن، كما أن الصعوبات اللي فيه سهلة ويمكن حلها بسهولة، مع وجود القاعدة والحوثيين، “أصلها ناس هترضي بقليلها”، وما دام كبير القبيلة قال يبقي الكلام يمشي، ومسئولة التفاوض علي هذا الوطن توكل كرمان للتسويق العقاري.

 

– السودان.. بقت شمال وجنوب، اختار اللي أنت عاوزه منهم، اللي علي السلم ولا اللي جنب باب الأسانسير، الاتنين مباحين “خش” بس برجالتك ولا يهمك، أصل الناس دي هتكسل تقوم حتي تفتح لك الباب، واللي حاكمنها عليهم أحكام، وبتوع التنفيذ بيطاردوهم، وفي كمان جزء خفية يمكن تقفله وتعمله حجرة ضيوف، وده مش هنكتبه في العقد، وأنت قفله بعد كده براحتك.

 

– لبنان.. مكان راقي وناس “ذي الفل” و”جيره عسل” و”محدش هيقف قصادك” لأن الرجالة مشغولة في الباديكيير، والستات عند الكوافير من إمبارح، وحتي مش فاضيين يجيبوا رئيس ليهم، وما يشغلهمش إنك تأجر عندهم، المهم حفلاتنا تمام، والكافية لاتيه سخن والـspa فاتح، وفيه عيل مشاغب هناك في الجنوب بس مشغول دايما بالجارة اللي علي الحدود، طول ما هو قاعد يحدف عليه مشابك، وهي تحدفه بحجارة.

 

– قطر.. أيوه معروضة للإيجار، ولكن للأجانب فقط، وخصوصا الأمريكان، لأن هناك غرفة مؤجرة سلفا، وخصوصا إن علاقاتها مع الجيران “زي الزفت” ومحدش بيعبرها، ومش بيعزموها علي مناسباتهم، ولا بيسلموا عليها، حتي لو قابلوها علي السلم، وبقت منبوذة في المنطقة، ومش عارفه تعمل إيه، لأنها كانت ناوية تكون شيخ حارة المنطقة لكن اللعبة باظت، ومش معاها غير العمدة أردوجان، وهو مش فاضي لها علشان “أم العيال” عملاله قلق في البيت، ووقفاله علي الواحدة.

 

– مصر.. معلش بقي كانت في وقت من الأوقات معروضة، لكن الله يجازيه الجيش بتاعها قطع يافطه الإيجار، وحط ترابيس علي الباب، وطلب الشرطة وأثبت حالة إن هو والشعب السكان الأصليين والوحيديين لهذا الوطن، وكتب عليها “هذا الوطن ليس للبيع أو الإيجار”، لكن إحنا بنحاول أن تصبح مصر معروضة للإيجار، ولن نيأس، وسنعلمكم بالمستجدات متي وقعت.

 

الخبراء المثمنون ( صدام، القذافي، عبد الله صالح، البشير، الحريري، بشار).

 

خدماتنا متميزة، والتسليم فوري، زورونا تجدوا كل يوم جديد.

 

“شركه الفوضي الخلاقة لتقسيم الأوطان والتسويق الدولي”

 

 

 

 

الوطن