«آسيا» تبيع «كسر الجاتوه» للفقراء..
«كسر جاتوه وباتيه وحلويات شرقية بأسعار تحفة».. كلمات اختارتها آسيا عبدالرحمن، كى تسوّق ما لديها من «كسر الحلويات» عبر صفحتها الشخصية بموقع «فيس بوك»، وأرفقت المنتجات بأسعار تنافسية، فثمن كيلو الباتيه والجاتوه 22 جنيهاً، والميلفاى والحلويات الشرقية 25 جنيهاً.
الكيلو بـ25 جنيهاً.. مع خدمة توصيل و«مش مهم الشكل»
بين المجموعات المختلفة، راحت «آسيا» تنشر منتجها فى انتظار الطلبات عبر الرسائل الخاصة، مؤكدة إمكانية توصيلها فى إمبابة والتحرير ورمسيس وفيصل، لكن التعليقات لم تدعها وشأنها: «إيه القرف ده، احترموا آدمية الناس، كسر جاتوه إيه؟» قالتها وداد عبدالقادر، لكن «آسيا» تمالكت أعصابها لترد بهدوء: «كسر الجاتوه يا فندم ده جاتوه اتكسر أثناء التصنيع أو التعبئة، وبييجى من المصنع زيه زى السليم، وبيخرج معبأ من المصنع فى أكياس مقفولة، والسوق عرض وطلب، أنا ما غصبتش على حد». على مدار 16 عاماً، ظلت «آسيا» ربة منزل فقط، لكن مرض الزوج دفعها للبحث عن أى عمل لرعاية أبنائها وزوجها، فبدأت فى بيع كسر الجاتوه، وتقول: «أمهات كتير بتاخد منى، وتعمله فى قوالب وتسقيه شيكولاتة أو كريمة، وتقدمه على إنه تورتة لولادهم»، تتمنى «أم أحمد» لو تقوم بقية مصانع الحلوى بتخصيص كشك مماثل: «الفقراء من حقهم ياكلوا حلويات».
الوطن
