السيسي عن تذكرة المترو: «سعرها هيبقى 3 أضعاف»
وقال الرئيس السيسي خلال حفل الانتهاء من أعمال الحفر والتبطينلأنفاق قناة السويس وخروج ماكينات الحفر العملاقة “تحيا مصر”: “عندي أمل أنا وكثير من المصريين في مشروع أكبر من هذا بكثير، وبتمنى عمل مرحلة الـ14 كيلومتر لمترو الأنفاق، إحنا مستعدين إنهم يخشوا يشتغلوا معانا ونعمل لأول مرة كل حاجتنا من الأول للآخر بشركات مصرية وبمعدات مصرية”.
وأضاف الرئيس: “هاخد الماكينات من هنا على مكان تاني هناك، بس لما بنيجي نعمل مشروعات زي كده بناخد قروض من دول بتمول المشروعات دي، لكن في الحالة دي التمويل هيكون من الدولة، والدولة قدرتها مش قوية إنها تمول مشروع بالحجم ده”.
وتابع الرئيس: “عشان كده محتاجين تنسيق مع البنوك حول القروض بفائدة مناسبة شوية، وبالمناسبة لن يكون سعر المشروعات دي للمستخدم بأسعار عادية زي ما بتتقدم.. لا.. النهار ده محتاجين 20 أو 30 مليار جنيه أنفاق بس ولما نحط المعدات في 10 مليارات جنيه كمان عشان كده مينفعش يبقي سعر تذكرة المترو بالسعر اللي موجود بيه دلوقتي ولا بضعف التذكرة ولا بثلاث أضعافها بصراحة كده”.
ووجه الرئيس السيسي حديثه للواء أحمد فودة قائلا: “لو كنتوا انتوا جاهزين يا أحمد أنا جاهز، وادرسوا الموضوع ده ونتكلم فيه وأنت المسئول عنه”.
وشهد الرئيس السيسي أعمال الحفر والتبطين بأنفاق القناة كما شهد خروج إحدى ماكينات الحفر “تحيا مصر” للجهة الشرقية.
ومن المقرر أن يفتتح الرئيس السيسي، اليوم السبت، عدة مشاريع قومية كبرى بمدن القناة وتضم الافتتاحات الكوبرى العائم باسم الشهيد أحمد منسى على قناة السويس، وكوبرى الشهيد أبانوب جرجس، بالقنطرة بجانب أيضا افتتاح أحد مراحل الاستزراع السمكى التابع لهيئة قناة السويس.
فيتو
