وزير التعليم لـ«الطلاب»: إجابة البابل شيت «إلزامية».. والتابلت خيار ثانٍ

10 يونيو 2021, 12:31 ص

علق الدكتور طارق شوقي، وزير التربية والتعليم، والتعليم الفني، على الجدل بين طلاب الثانوية العامة حول طريقة الامتحانات، قائلا إن الأمر أبسط مما يدور حوله من حوار، فالقضية ليست صعبة كما يتصور البعض، فالوزارة عكفت على تقديم طريقتين لحل الطلاب بدلًا من حل واحد كان يتم تقديمه كل عام، «الناس كانوا خايفين من التكنولوجيا والتابلت والأسئلة مع الإجابات وسقوط السحابة، قدمنا الحل ده وقدمنا تاني البابل شيت».

وأضاف «شوقي»، خلال مداخلة هاتفية في برنامج «بالورقة والقلم»، مع الإعلامي نشأت الديهي، على شاشة «ten»، أن البابل شيت سيتم تصحيحه إلكترونيا فليس هناك أي مخاوف من أجل إنهاء الجدل، «لما الطالب يصل للجان هيستلم ورقة امتحانت ورقية ومعاها بابل شيت، وكمان هيبقى معاه التابلت، يقرأ الأسئلة سواء على التابلت أو الورقة ولازم يرد بالإجابة الأصلية على البابل شيت، عشان مخاوف قطع الكهرباء أو وجود أي شيء في السيرفر».

وتابع: «مش عاوزين الناس تبقى قلقانة من حاجة، ولو حدث أي سقوط للسيرفر نبقى مطمنين، ملء البابل شيت هيكون إلزامي مش اختياري، التابلت هيكون اختياري، البابل شيت ده الإلزامي، البابل شيت هيتم عمل سكانر له وتصحيحه إلكترونيًا، لو تعذر قراءة البابل شيت بسبب كثرة الشخبطة هنلاقي الإجابة بوضوح على التابلت، بس البابل شيت هي الإجابة اللي هتكون معتمدة حال اختيار أكثر من اختيار متعدد».

وأوضح وزير التربية والتعليم، والتعليم الفني، أنه في حالة قيام الطالب باختيار إجابة في الاختيار ما بين المتعدد على التابلت مختلفة عن البابل شيت سيتم اعتماد إجابة البابل شيت، «احنا مقدمين حاجة إضافية لكل الأسئلة دي ومش لازم نخلق توتر من شيء احنا مقدمينه للمساعدة، لكن تسابق عناوين صحفية غير مكتملة والحصول على الانفرادات يؤدي لنتائج عكسية، مش بيبقوا عارفين اللي الصحفي بيقوله ده رسمي ولا لا».

وواصل: «فيه بيانات بتصدر من وزارة التربية والتعليم، وفيه بيانات على صفحة الوزارة على الفيس بوك، وفيه صفحتي الرسمية على الفيس بوك غير كده متلجأش لأي مصدر آخر، الطلاب بدل ما يسألونا بيسألوا بعض».

elwatannews
(Visited 5 times, 1 visits today)