أصوم.. ولّا بلاش؟!
مش عارف أصوم ولا لأ؟.. لأول مرة مش عارف.. ناس كتير مش عارفة زيى.. تصوم ولا لأ؟.. سبب حيرتى أن كل اللى بيتكلموا عن الصيام إما بيتحزموا بحزام ناسف، أو بيفجروا منشأة حكومية أو شرطية.. مش عارف همّه اللى صح! ولاّ إحنا؟.. بيقوموا لصلاة الفجر، بعدها بدقائق يتم تفجير محطة مترو.. بيصوموا وقبل ما ينووا الصيام بيفجروا سنترال.. ينفع نصوم من غير حزام ناسف ولا لأ؟!
مشكلتى أنا وناس كتير إن إحنا مش هنعمل كده.. لا هنفجّر سنترال، ولا محطة مترو.. يبقى ينفع نصوم؟.. ما حكم صومنا؟.. عاوزين رأى المفتى؟.. يا فضيلة المفتى: لو صمت من غير حزام ناسف ينفع؟.. لو مقدرتش أفجّر مترو أو سنترال يجوز؟.. عاوزين صحيح الدين؟.. عاوزينك تدعبس فى أمهات الكتب.. شوف آراء الفقهاء الأربعة.. لو كان ينفع نصوم؟.. ما معنى ما يفعله الخرفان كل يوم؟!
كنت باستنى رمضان من عام لعام.. كنت بقرأ القرآن كام مرة.. كنت فاكر إن ده هو الصيام.. كنت فاكر إنى أنا وااااصل.. دلوقتى كل اللى فات كان وهم.. كان غلط.. لا عمرى كنت فى جماعة ولا تنظيم.. طب هو ده ينفع صيام؟.. هو ده ينفع دين؟.. هو ده ينفع إسلام؟.. لا عمرى كنت فى جماعة سرية ينفع؟.. لا عمرى قمت الفجر، ونويت بعدها حرق كنيسة.. يبقى إيه الدين الصحيح يا مولانا؟!
مش هصوم تانى، إلا وأنا عارف صحيح الدين.. مش هعذب نفسى بالصوم، وأمتنع عن الأكل والشرب، من غير ما أعرف أنا صومى صح ولا لأ؟.. هل يصح صيامى كما كنت أصوم زمان؟.. هل يصح من غير ما أطلع فى فريق سرى لحرق البلاد؟.. هل إعلاء راية الإسلام يحدث بأشياء أخرى غير الصلاة والصوم؟.. هل نتقرب إلى الله بحرق الكنائس وتفجير المحطات، وارتداء الأحزمة الناسفة سراً؟!
دلونى يا أصحاب الفضيلة.. همه اللى صايمين ولا أنا؟.. همه اللى مقبولين ولا أنا؟.. ربنا عاوزنا نجاهد فى سبيله، ولا عاوزنا نصوم ونصلى ونتسامح؟.. أروح القاعدة عشان أبقى قريب من ربى، ولا أنضم للتنظيم الدولى؟.. أنا مش عارفنى.. أنا مش أنا.. أنا مش هصوم تانى من غير ما أعرف حكايتى.. مش عاوزكم تضحكوا عليا.. مش عاوزكم تغشونى تااانى.. اللى بيتهمنا بالكفر صح ولا هوّ اللى كافر؟.. عاوزينكم تصححوا لنا العقيدة.. ناس كتير اتلخبطت.. ناس كتير اتحيرت.. ناس كتير مش هتستنى رمضان!
معذرة يا فضيلة المفتى.. أنا من إيديك دى لإيدك دى.. بس عاوز كلمة واحدة.. أصوم ولا لأ؟.. أستنى رمضان اللى أنا عارفه، ولا رمضان بتاع «المجاهدين»؟.. رمضان اللى بقعد أصلى فيه وأقرأ القرآن، ولا رمضان اللى أنا أروح بعد الفجر أحرق فيه محطة ولا سنترال؟!.. أنوى الصيام ولا بلاش؟!
المصرىاليوم
