«محمود» تاجر الأعلاف: «الخروف الصح ياكل يومياً بـ7 جنيه.. واللى بياكل زبالة يتكلف جنيه واحد»
العيد فرحة لدى كل الناس، لكنه عند محمود أبوالعينين (تاجر الأعلاف) فرحتان، ففرحة العيد أتت مع فرحة الزواج الذى ينتظر مكسب الموسم ليتمه فى رابع أيامه، هو ولد من بين 6 أبناء رجال و5 بنات، اكتفى بالشهادة المتوسطة ليتابع عمل والده فى «شونة العلف» ويصبح كبير الأسرة.
محمود، الشاب الثلاثينى، يعتبر عيد الأضحى موسمه الذى ينتظره من العام للعام؛ ففيه يعوض ما يفوته من مكسب طيلة عام: «اليومين بتوع العيد ببقية السنة».. المحل الذى ورثه عن والده ظل كما هو منذ أن مات، لم تتغير ملامحه؛ فلم تزل «المدششة» فى مكانها، وهى الآلة التى تطحن الفول والذرة: «العجل ما يعرفش ياكل العلف صاحى، لازم ندشه»، وإضافة للمدششة هناك «الأناجر»، وهى أحواض عريضة لأنواع العلف المختلفة، إضافة إلى المخزن الداخلى للأعلاف.
أنواع متعددة يبيعها محمود العلاف، منها: «الفول المستورد والبلدى والذرة الصفراء والبيضاء والعويجة، وهى ما يطلق عليها الدشيشة»، ويقول: «طن الفول المستورد بـ400 جنيه، وهو ده بتاع البهايم، لكن الفول البلدى بـ1000 جنيه، بس ده ببيقى للبنى آدمين، ومع ذلك بيكون فيه ناس بتطلبه للبهايم وكمان فيه الردة الطن منها بـ2025 جنيها»، كما يتوقع المكسب فهو أيضا يعلم أن غيره «عايز يُرزق».. ذهابه لسوق الساحل لشراء العلف مرتين فى الأسبوع يتغير موعده قبل موسم العيد: «قبل العيد بنزل السوق بـ10 آلاف جنيه وأرجع مديون».
مكسبه لا يزيد على 20 قرشا فى كيلو الفول المستورد وفى الدرة 30 قرشا: «المكسب يمكن مش كتير زى ما الناس فاكرة بس هى الحاجة ولعت السنة دى».
محمود العلاف يقرر استغلال موسم العيد لأقصى درجة؛ ففيه يأتى ببعض الخراف ليبيعها لزبائنه التى تثق فى علفه: «الخروف بيتكلف أكل 7 جنيه فى اليوم، عشان كده بيبقى غالى، لكن الخروف اللى بياكل من الزبالة بياكل بجنيه فى اليوم وساعات ببلاش كمان».
وجبتان رئيسيتان لا يمكن لأى خروف الاستغناء عنهما يعرفهما كل من «يئنى» خروف، يحددهما «محمود» بوجبة الإفطار وهى من البرسيم أو الدراوة «دى زى الفول عندنا تبطن بطنه وتنظم الهضم عند الخروف، أما الوجبة الرئيسية فبتكون بعد العصر وبتبقى كيلو دشيشة وكيلو فول ونص كيلو ردة»، «الخلطة السحرية» يصنعها محمود لزبائنه فى أيام العيد: «بتبقى خلطة عبارة عن قشر فول ودرة صفرا عويجة ودرة بيضاء وشعير والكيلو منها بـ2٫5، والخروف الواحد بيستهلك 2 كيلو يوميا».
الوطن
