صدق أو لا تصدق .. الجبلاية تستعين بنانسى عجرم لعودة الدورى
الدنيا حلوة واحلى سنين , بنعيشها واحنه ياناس عاشقين , ننسى اللي فاتنا ونعيش حياتنا عالحب متواعدين , دة مش كلامى ده كلام الست لالا الست دى كبيرة عليها قصدى البنت الجميلة نانسى عجرم فى رائعة من روائعها الخفيفة , بس مش عارف لية كل ما أسمع الأغنية دى أشعر أن جمال علام رئيس الإتحاد المصرى وكل أعضاء الجبلاية هم اللى بيغنوها للأندية المصرية ولوسائل الإعلام ولأى حد خارج مبنى الجبلاية , تقدر تقول بيضحكوا عليهم وبيسكنوهم أو بيخدروهم أو بينيموهم مغناطيسى .
هنحكى الحدوتة بإختصار وبدون كلام مكلكع أو فزلكة , البداية لما قالوا ان الدورى فى نصف سبتمبر وقبلها بأيام حصل إقتحام الإتحاد من الألتراس ورغم تأكيدات الوزير بعودة الدورى الإ أن التأجيل كان هو الحل ومر شهر وبعده شهر وبعده شهر ومفيش جديد غير الكلام على رأى المثل ” مش بأخد منك غير الكلام ” وأخيراً التأجيل لشهر فبراير على ما أعتقد إن شهر فبراير هيكون فيه إنتخابات مجلس الشعب يعنى كمان شهرين يعنى من الأخر وعلى بلاطة مفيش دورى ومفيش نانسى وفيه حاجة واحدة بس حكومة الإخوان بتغنى ليهم هى كمان ” انسى انسى متقولشى يرجع تانى وبلاش تترجى فيا ” الدورى مات يا عنيا مع الإعتذار لأخونا إيهاب توفيق , مفيش دورى مفيش كورة وكل عام وأنتم بخير .
بوابه الفجر
