المهم ذهبت معاها للشقه علشان نجهز البضاعة قبل ما توصل زيزى وسوسن بنات اختها بالسلامة علشان يتفرجوا على الملابس الحريمى والاطفالى ويشتروا .. والله حاجة تنقط  يتفرجوا  ازاى  قبل الافتتاح !!!! .

وطول الطريق حماتى عماله  تتخانق مع دبان وشها وتزعق وتشخط  بصوت عالى .. وانا مصدر الطرشة عامل انى مش هنا .. وزى مابيقولوا يعنى عامل عبيط .

تلفون حماتى رن الوووو .. وهات يارغى ..  ايوه يادعاء يابنتى .. آه رايحه شقتى .. اعمل ايه فى الغلب ده  والتعب ده والشحططه دى .. آه منه لله المحروس اللى كان السبب .

مش عامل فيها فلحوس  وحط البضاعة هناك ، ( المحروس والفلحوس ده اللى هو انا ) طبعا طبعا هاراجع البضاعة كلها .. وياويله لو فيه حاجة ناقصة .

 آه طبعا هاخصمها عليه ،  ماتخافيش امك مش لقمة سهله خالص ، قلت فى سرى ( تخصمها عليا ازاى هو انا اساسا خدت  منهم فلوس ) .

وانا عمال اهدى فى نفسى .. وقلت فى سرى (  طيب والله لازم  اضايقها شويه زى مابتعمل معايا ) قلت : بقولك ايه ياماما ، حماتى : عايز ايه ياجدع انت .

قلت : ياحدع انت مين  .. ده انا جوز بنتك .. انتى نسيتى اسمى مجدى ، حماتى : يعنى ياخويا  فاكر نفسك مجدى يعقوب ولا مجدى عبد الغنى .. ولا مجدى الحسينى .

قلت : احمدى ربنا بقى ..هو يعنى الجراح العالمى .. ولا نجم الكورة كانوا نسايبك .. طيب ياريت  كنت  مجدى الحسينى عازف الاورج الشهير .. كان زمانى ميت ومرتاح وماشفتش الوشوش دى .

حماتى : قصدك وشوش مين يعنى ، قلت : الوشوش العسل دى اللى قدامى .. اصلى مابحبش الحاجات الحلوه .. العسل  بيوجع لى سنانى .

حماتى : عجبك كده المشاوير دى ، قلت : خلاص بقى ياحماتى انسى .. وبعدين المسامح كريم ، حماتى : انسى زى انت مانسيت انى رئيس مجلس الادارة .. وبتشتغل من دماغك .. وبعدين كريم مات .

 قلت : بجد  كريم  مات امتى .. ماحدش قال لى .. تصدقى ياحماتى كريم ده كان طيب قوى زيك كده قلبه ابيض ، حماتى: اسكت بقى دماغى صدعت ، قلت : من الرغى فى المحمول .

حماتى : بتقول ايه ؟ قلت :  بقولك  مش تتصلى بمحل السمك تطلبنى لنا الغدا وتظبتى المسائل ، حماتى : لسة بدرى ، قلت : بدرى من عمرك .

على بال مانوصل ونبدأ نشتغل يدوب .. وماتنسيش تعملى حساب مراتى وعيالى الخمسة كلهم جايين على الغدا … وكمان  زيرى وسوسن بنات اختك وكمان عيالهم وشوفى بقى بالمرة مين جاى من بناتك .

حماتى : اما نشوف الاول اللى هايتغدوا عددهم كام ؟  ، قلت : حماتى حماتى ، قالت : عايز ايه ؟ ، قلت : ياريت تطلبى لى شربة سى فود مع السمك ..  انا بحبها قوى .

تليفونى رن المدام بتتصل ، قلت : اتاخرتى ليه انتى والعيال ، المدام : احنا فى الطريق ياجوزى ، قلت : طيب كويس علشان تلحقوا عزومة حماتى .

المهم وصلنا وجهزنا البضاعة ، حماتى : اعمل حسابك زى ماجبت البضاعة هنا بيتى ف العباسية هاتوديها امبابة ، قلت : ياعالم بكره فيه ايه  ، حماتى : وكمان النقل على حسابك .

قلت : لية بقى ؟ ، حمايا : حرام عليكى جوز بنتى غلبان وطيب  ، حماتى : وانت كمان عليك الغدا ياجوزى  ، حمايا : ليه بقى ؟  ، حماتى : علشان انت اللى فتحت  له الشقة يدخل  فيها البضاعه .

قلت : اعمل حسابك ياحمايا هاتدفع فلوس جامدة المعازيم كتير  ، حماتى بغيظ : انت فرحان علشان هربت من العزومة دى ياجوزى بنتى وجبت البضاعة هنا .

حمايا : حرام عليكى جوز بنتك طول عمره بيعزمنا فى شقته ، حماتى : انت تسكت خالص ..هو انت  المحامى بتاعه ،  قلت : ربنا يخليك ليه ياحمايا يا جميل .

المهم زيزى وسوسن واخوات المدام وعيالهم حضروا .. واتفرجوا على الملابس .. والشقه  بقت مولد وزحمه ، حماتى : اقعودوا  ساكتين ياعيال ،  ماجدة : حرام عليكم الدوشة  مش عارفين نتكلم .

وانا عمال اضحك وافتكر المولد ده لما كان فى شقتى  .. ماكنش حد منهم بيسكت العيال خالص ، زيزى : احنا ياخالتى اخترنا شوية ملابس لينا وللاولاد ، حماتى : اللى يعجبكم ياحبايبى  خدوه  .. وكمان ليكم خصم  20% .

 سوسن : كتر خيرك ياخالتى ..بس كنت عايزه اقولك ..اننا  مش عاملين حسبنا على دفع حساب الملابس دلوقتى .. ممكن نخدها بالقسط ، حماتى : وماله يابنتى تحت امرك اعتبرى الحساب وصل .

وانا فى سرى ( اعتبرى الحساب وصل ازاى .. دول جايين قبل الافتتاح .. وواخدين ملابس ثمنها6000   جنية مع  خصم 20%   ..  وكمان قسط  .. الله يسامحك ياحماتى ) .

المدام : ايه ياجوزى مالك ، قلت : مبسوط على الاخر ، المدام : ربنا يبسطك على طول .. على فكرة  الفستان ده عاجبنى قوى عايزه اخده للبنت فاطمة .

قلت  : وماله  خديه عادى ، حماتى : بس لازم تدفع تمنه كاش .. آه الشغل مايزعلش  .. اى حد فينا ياخد حاجة يدفع تمنها ، المدام : هيه جت على فستان فاطمة .

قلت : وماله ادفع بس عايز خصم ، حماتى : حاضر خصم 10%  علشان خاطرك ياجوز بنتى ، قلت : كلك واجب ياماما .. كتر خيرك  مش عايز الفستان والخصم  .

دعاء : ليه بس انت زعلت ، ماجدة :  ويزعل ليه بقى ؟ ،  ولاء : هو فيه حد يزعل من الحق ، حماتى : ماتنساش اجتماع مجلس الادارة الثانى يوم السبت القادم .. عندك ياجوز بنتى  اهو يبقى جنب المحل .

 قلت : ياريت بقى تجيبوا معاكم  مستلزمات الاجتماع من مشروبات وعصائر ومياه معدنية ، حماتى : ليه بقى ؟ ، قلت : عادى الشغل مايزعلش .. هو فيه حد يزعل من الحق .. وياريت ياحماتى تطلبى لنا الغدا  كباب دليفرى .. العيال زهقت من السمك .

البقية المقال القادم

مبتدا