قصيدة «ضحكة الحاجة» للشاعر أحمد علي عُكة
جنيه البقشيش
بيخلي صبي القهوجي
يضحك لك
ضحكة الحاجة
لما يشوفك
داخل من باب القهوة
يمسح لك كرسي
بكم قميصه المتقطع
وينزل لك
شيشة وشاي بحليب
لو طال انه..
يرتب الهوا حواليك
مش راح يتأخر
بعد الوردية
هتشوفه ع الرصيف
بياكل كشري
وبيتفرج..
علي كام عيل من سنه
بيلعبوا السبع بلاطات
والناحية التانية
من الشارع
صوت ليلي نظمي
بيعدي..
من أتوبيس مدرسة
يغني معاها..
بصوت مسموع
وجوايز للشطار.. وهدايا للشطار..
وكل واحد فيكم.. علي كيفه يختار
فجأة..
يجري ع الصيدلية
يطلع جينهات البقشيش
يلاقيهم ناقصين جنيه
فيضحك..
ضحكة الحاجة
فيمد الدكتور ايده
بعلبة الدوا
ومعاها جوز جينهات
فتدمع عين الولد
ويضحك..
ضحكة حقيقية
مبتدا
