كشف سر موقعة الديك الرومى (2)

وصرخت المدام زى ارشميدس وقالت: وجدتها وجدتها!!!!علشان تعرف قيمة زوجتك فى الظروف الصعبة.. شوف ياسيدى ممكن تاخد الديك معاك الصبح وأنت رايح الشغل،قلت: لا لا مش ممكن امشى معاه تانى فى الشارع.

(ومدام حنين ياحضرات ساكنه فى المهندسين وكانت زميلة المدام فى الجامعة بس ربنا كرمها اتجوزت رجل اعمال كبير )، قلت: حاضر ممكن تسيبينى انام.

شويه والمدام صرخت تانى : جوزى .. جوزى ممكن تقوم تدبح الديك دلوقتى علشان الحق انظفه واجهزه علشان تخده معاك الصبح.

قمت ياجماعة دبحت الديك وهات ياشغل معاها شويه وسمعت اذان الفجر قلت: عاجبك كده يعنى لانمت ولا اتسحرت ، المدام: معلش ياجوزى بكره تفطرعلى ديك رومى.

صليت الفجر فى الجامع وراجع أنام، المدام: تنام ايه ياراجل انت يادوب تلحق تودى الديك لمدام حنين وتطلع على الشغل.

وأنا فى الشغل المدام اتصلت.. فيه ايه ياست،المدام: وأنت جاى هات معاك شويه فاكهة على عصايرعلشان الفلوس خلصت، أنا مسكت نفسى وماردتش ازعق.

جبت الفاكهه ولسه داخل من باب الشقة عاوز انام،المدام: جيت فى وقتك ياحبيبى ممكن تعمل السلطة،جرس الباب رن حماتى واخوات مراتى وازواجهم وعيالهم وصلوا.

قلت: أهلا وسهلا نورتونا.. بيتكم ومطرحكم، شوية والمحروس أخوها رن رنة من تليفونه المحمول وقفل الخط، اتصلت بيه المدام من تليفونى وأنا قلبى بيتقطع من كتر الرغى.

المدام: أعمل حسابك ياجوزى تجيب الديك قبل المغرب وأخويا راح يستناك على الناصية بالتاكسى،بعد ساعة المحروس رن رنة وقفل، المدام اتصلت من تليفونى.

وقالت: أخويا بيقولك تعالا،العيال شبطوا عايزيين يروحوا معايا نجيب الديك،أخت المدام قالت: عيب ياولاد اسكتوا،وأنا ماحبش حد يزعق لعيالى أبدا بالعند فيها قلت: تعالوا معايا ياحبايبى.

جبنا الديك أفندى على صينية كبيرة شكله ايه ياحضرات يرد الروح محشى باللوزوالبندق وعين الجمل والزبيب والريحة ايه حاجة تفتح النفس.

ركبنا التاكسي أنا والعيال مع المحروس أخوها.. الشوارع كانت زحمة خالص وانتم عارفين زحمة قبل الفطار وبالذات أول يوم رمضان،المحروس أخوها رن رنة وقفل.

المدام اتصلت قال: أيوه يااختى الطريق زحمة خالص،شوية وحماتى رنت وقفلت،اتصلت أنا: أيوه ياماما،حماتى: اتأخرتم ليه؟ .

المحروس خد التليفون منى واتكلم: أيوه ياماما صعب نوصل قبل الفطار،الزحام شديد..العربيات وقفت مكانها على الكوبرى، المدفع ضرب .. آذان المغرب .. الله اكبر ..الله اكبر.

وهنا ياحضرات ظهرت شهامة وجدعنه ولاد البلد الناس عماله توزع اكواب البلح والعرقسوس والتمر هندى ولقيت راجل جايب عصير ليه أنا والعيال والمحروس أخوها.

أنا بصراحة الدمعة فرت من عينى..ياسلام على شهامة ولاد مصر وأنا برضه مصرى صعب عليا الناس دى تفطر كده فى الشارع .

رحت مطلع الديك الرومى من العربية وقطعت حته للعيال وهات ياتفريق وتوزيع على الناس..والمحروس أخوها عمال يشد فى شعره ويلطم وعايز ياكل مع الناس.

أنا قلت: عيب عليك ياراجل..سيب الناس تفطر،اتغاظ وراح رن رنة على مراتى،المدام اتصلت.. قال لها أنا عزمت الناس على الديك.

المدام كلمتنى وقعدت تصرخ: ايه ياراجل أنت اتجننت تفرق الديك فى الشارع،قلت: يامدام رمضان كريم وكل شئ بثوابه، المدام: طيب أعمل ايه مع بابا وماما واخواتى.

قلت:ما انتى واخدة مني 300 جنيه وعندك الاكل كله..لازم يعنى ديك رومى..هما كانوا يعنى شافوه قبل كده فين..اقفلى الخط حرام عليكى الفاتورة راح تخرب بيتى.

المدام: طيب ياجوزى لما ترجع ليه معاك حساب كبير قوى،وقفلت السكة فى وشى..وأنا والله سعيد ومبسوط علشان الناس الحمد لله فطرت وشبعت الف الف هنا وشفا.

قلت للمحروس اخوها : ممكن اعمل مكالمة من تلفونك المحمول لانك خلصت رصيدى، المحروس: اتفضل بس هاتكلم مين، قلت: زميلى فى الشغل الاستاذ غريب.

المحروس: ماشى بس رن عليه واقفل وهو يتصل بيك علشان ماتخلص الكارت بتاعى،قلت: ماشى..بس ياحضرات رنيت على الأستاذ غريب رنة واتنين وتلاتة وأربعة وخمسة.

والمحروس هايتجنن ويزعق: أقفل الخط بسرعة،وأنا مطنش..رد عليا صديقى الاستاذ غريب وقعدت اتكلم معاه واضحك والمحروس مطرشق من الغيظ.

ومش قادر يقول حاجة..وأنا عمال احكى حكاية الديك من اولها والحاج غريب يضحك وأنا اضحك..وللأسف ياحضرات الكارت بتاع المحروس أخوها خلص والخط قطع.

قلت للمحروس: ممكن تشتري كارت جديد علشان أكمل للأستاذ غريب حكاية الديك الرومى .

المبتدأ