مبارك: السيسي مطلعش إخوان
في حديث نادر بين الرئيس الأسبق وطبيبه وضابط حراسته
مبارك: السيسي ده طلع «عُقر» مطلعش إخوان.. وبقى موجود معانا على رأس قائمة الاغتيالات
نتنياهو قاللي بصراحة لو سبنا بتوع غزة يروحوا على سيناء؟.. قلت له: انسى الموضوع ده Forget it..
شيوخ قبائل سيناء مجرد ديكور.. والشباب الصغير اللي تحتهم هم اللي بيمشوهم
«الإخوان» مجانين قتلوا الجنود ومصممين يخبطوا في الجيش وده غباء.. مفيش دماغ
ثورة يناير بدأت في 2005 على يد أمريكا.. وفي 2010 حسيت إنهم عاوزين يمشوني بأي ثمن
مصر محتاجة لرئيس من الجيش يكون قوياً وعنده كاريزما
أختلف او أتفق مع مبارك.. بسياساته وحكمه وسلبياته وايجابياته ان كنت من المؤيدين أو المعارضين فكلنا هذا الرجل، لكن ما لا ينكره أحد ان مبارك أحد أهم الشخصيات المؤثرة في تاريخ مصر، وأن ثلاثين عاما من عمر مصر كانت معلقة بين يدي هذا الرجل، وهو ما يجعل الصغير قبل الكبير في غاية التلهف لمعرفة ماذا قال هذا الرجل عن حكمه وعهده؟..
في هذا الحديث العفوي بين مبارك وطبيبه ستجد نفسك أمام شخصية تجاوزت الخمسة وثمانين عاماً من عمرها.. لكنها تتمتع بحيوية ذاكرة شاب في العشرينات.. يدقق ويحكي بتفاصيل شديدة الترتيب.. يضرب الأمثال ويدلل على صحة كلامه.. على دراية كاملة بما يدور حوله.. يتناقش مع الآخرين حول أسعار الخضروات والفاكهة والمواصلات والصرف الصحي والحياة ويستمع لآرائهم في الأحداث السياسية والاقتصادية والدولية.. يتابع ما ينقل عنه وما يحدث في وسائل الاعلام من مظاهرات ومؤتمرات وفعاليات.. يضحك ويحزن كثيراً.. لديه رغبة كبيرة في السرد والتذكير والتوضيح.. ربما لكثرة ما يضيق به صدره من الأسرار أو لتبرئة نفسه أمام التاريخ من جهة وتحسين صورته أمام الرأي العام من جهة أخرى.
سأل ضابط الحراسة الرئيس الأسبق قبل ثورة 30 يونيو: «هل تتوقع الجيش يعمل حاجة؟».. فرد مبارك: «حاجة زي ايه؟!».. فأضاف الضابط: «يعني يتدخل لحماية البلد في قصة زي سد النهضة أو مشروع قناة السويس أو البلد نفسها وتولي الحكم»؟.. أجاب مبارك: «أشك»..
هنا لابد ان تنتبه.. الحوار يدخل المناطق الأكثر اثارة وأهمية.. دور القوات المسلحة والجيش قبل وبعد الثورة.. رأيه في الفريق أول عبدالفتاح السيسي، وزير الدفاع.
في حديث سابق قال مبارك: «وزير الدفاع أظن على هواهم ومستشاره القانوني اللواء ممدوح شاهين تبعهم ابنه متجوز بنت أخت الكتاتني.. ياعم خليها على الله وخلينا ساكتين مش عايزين نسرب الكلام ده».. فيقاطعه ضابط الحراسة: «بس احنا خايفين على البلد».
يرد مبارك: «ديه اتهدت بيبوظوا كل اللي بنناه في 30 سنة»، قاطعه الطبيب: «ويقولك الرئيس عنده 70 ملياراً».. فيواصل مبارك حديثه متهكماً: «لا يا سيدي هيكل قال 9 مليارات ولما جابوه بتوع الكسب قالهم أنا قريت في الجرايد، ده.
وصل الانحطاط الأخلاقي ببتوع جهاز الكسب غير المشروع انهم يسألوا الفراش.. هو الرئيس كان بيشيل شنط ويسفرها.. أولاً أنا مابكذبش لو عندي هقولك.. ايه الانحطاط ده أنا ماشفتش كده.. وكل اللي عندي معروف في البنوك.. وفلوس ولادي كلها شغل من بره ولا عمرهم دخّلوا ولاطّلعوا دولار بره البلد.. جمال اشتغل مدير بنك 12 سنة».. يؤمّن الدكتور على كلامه: «ربنا هيظهر الحق ان شاء الله».
وفي تسجيل آخر بتوقيت مختلف..
يسأله طبيبه الخاص مجدداً: «توقعاتك ايه لـ30 يونيو؟».. فيرد مبارك: «والله أنا مش متوقع حاجة.. مش عارف، أشك ان الجيش يعمل حاجة»..
يسأل الطبيب: «هو ممكن يحصل زي ما حصل قبل كده؟!»..
يتساءل مبارك: «تقصد ايه؟!»..
يوضح الدكتور: «يعني الجيش يشيل الرئيس زي ما حصل قبل كده؟»..
فيرد مبارك: «والله بس الموضوع صعب الاخوان متبتين في الحكم.. بس الضغط صعب جدا في الشارع، أكتر من اللي فات»..
فيرد الدكتور: «بس الاخوان مسيطرين على الجيش والسيسي؟»..
يوضح مبارك: «أيوه بس الأمور صعبة»، مشيراً الى حالة الاحتقان السائدة في الشارع المصري وتصاعد موجة الاحتجاجات والغضب.. «هو ممكن الجيش لو لقي الأمور بتسوء يمشيهم.. لكن انه يخش وسط المتظاهرين لا يمكن أبداً هيتبهدل»، في اشارة الى صعوبة تدخل الجيش في السياسة والنزول للشوارع.
يبادله الطبيب: «ده حتى كل أنصارهم سابوهم»..
يعاود مبارك الحديث: «الجيش ماينفعش يتورط مع البلطجية.. مش كل اللي بينزلوا متظاهرين»..
فيؤكد الطبيب قائلاً: «البلطجية نازلين بشدة يوم 30 يونيو المرة دي»..
فيؤمّن مبارك على كلامه: «آه وهيبقى فيه دم»..
يقاطعه الطبيب: «وهما مش هيسيبوه بسهولة»، في اشارة الى الحكم والسلطة..
فيجاوب مبارك: «لا طبعاً دول ما صدقوا لقيوا حتة عضمة».
يحكي الطبيب الخاص للرئيس الأسبق عن مظاهرات ومسيرات الاخوان الرافضة للانقلاب. قائلاً: «هو ده اللي بيوقف الطريق ويعمل المشاكل»..
يسأل مبارك بتعجب: «هما ماشيين؟!»..
يرد الطبيب: «آه بيقولوا انهم كانوا بيوقفوا لينا الدنيا واحنا حاكمين – في اشارة الى مظاهرات المعارضة للاخوان وقت حكم الرئيس السابق محمد مرسي – دلوقتي نوقفلهم الدنيا بقى زي ما كانوا بيعملوا.. وكل ما بيبقى فيه مظاهرة بيبقى فيه حد بيضرب»..
يقاطعه مبارك: «ضروري»..
يتابع الدكتور: «سواء كان حد من برة أو حد من جوة يضرب.. يبقى فيه ناس تتقتل، يبقى فيه ناس تموت»..
يرد مبارك: «أكيد»..
يستكمل الطبيب: «ليا واحد قريبي هناك معتصم في رابعة بقوله يا ابني تعالى أمك بتموت.. مبقاش يرد.. لحد ما قفل التليفون»..
يقاطعه مبارك: «معمول لهم غسيل مخ».. يكمل الطبيب: «مفيش خالص»..
يسأله ضابط الحراسة: «هو معاهم، يقصد جماعة الاخوان؟»..
يرد الطبيب: «أه ما أنا اكتشفت انه معاهم.. عضو جامد.. هو أساساً طالب في كلية»…
يقاطعه ضابط الحراسة: «معمول لهم غسيل مخ ازاي يعني.. انت اتكلمت معاه؟!»..
يجاوب الدكتور: «آه اتكلمت معاه.. يقولك ده جهاد.. وينزل على الفيس بوك «بوستات» ده جهاد للشرعية ونفس الكلام اللي بيقوله مرسي ودي حرب على الاسلام»..
ثم يكمل: «قولتله يا ابني ماكنتوا تنجحوا كنا هانشيلكوا فوق رأسنا.. احنا كنا عايزين أي حد يبقى كويس هنشيله على رأسنا من فوق.. انتوا فشلتوا فشل ذريع.. وانتخبناكوا ومفيش.. طيب تعالى بص على أمك على أبوك تعالى غيّر هدومك.. مابيجيش»..
يقاطعه ضابط الحراسة: «مفيش خالص.. قاعد هناك على طول»..
يتدخل مبارك قائلاً: «ماهو بيقبض فلوس هناك».. يسأل الضابط: «هو أصلاً بيشتغل ايه؟»..
يجاوب الدكتور: «طالب في سنة تانية كلية طب أسنان.. وساقط كل سنة.. أنا بنتي كانت في بكالوريوس هندسة فنون تطبيقية خلصت امبارح.. وهو قبلها كل سنة قاعد يسقط يسقط.. ماهو مش فاضي للمذاكرة»..
ويتابع: «قاعد هناك على طول اجتماعات وتنظيمات وبتاع وعلى الفيس بوك»..
يسأل مبارك: «دماغه بايظه؟!»..
يجاوب الطبيب: «دماغه بايظه خالص ومابيفهمش».. يتدخل مبارك: «عندهم غسيل مخ كامل»..
يرد الدكتور: «أنا اكتشفت كلهم كده ماعندهمش استعداد يتناقشوا مع حد خالص.. واكمل أنا عندي عدد كبير في الجامعة منهم فأنا بسمع وخلاص.. هتخانق مع كل الناس.. خلينا صحاب كده وخلاص.. لكن للأسف لما يبدأ يتعدى حدود الشارع ويضرب وبتاع.. ودلوقتي الموت في سبيل الله وشهادة فكده خلاص واهب نفسه للاخوان»..
في حديث آخر بعد ثورة 30 يونيو.. يتحدث الطبيب الخاص لمبارك قائلاً: «شفت أهوه السيسي متطلعش اخوان».. في اشارة الى ان الفريق أول عبدالفتاح السيسي وزير الدفاع ساند الجماهير وانحاز للثورة ضد الرئيس محمد مرسي، وأطاح بالاخوان المسلمين.. فأجاب مبارك ضاحكاً: «لا ده طلع عقر».. يكمل الطبيب: «في 9 يونيو في الأهرام ليه صورة جامدة.. بيتدرب مع القوات وبيجري وراهم.. لافح الجيش كله ورا ظهره.. وليه شعبية كبيرة أوي في الشارع»..
يجيب مبارك: «أه طبعاً»..
ويتحدث الطبيب عما يفعله الاخوان والجماعات الارهابية من تنفيذ عمليات تخريبية والاعتداء على رجال الجيش.
ويقول: «طبعاً.. دول لو طالوا السيسي هيدبحوه»..
يضحك مبارك: «السيسي بقى في الليسته معانا»..
يستكمل مبارك: «كل الدول العربية فرحت ورجعت لمصر»..
يرد مبارك: «يوووووووووه طبعاً»..
ويروى الطبيب للرئيس السابق احدى النكت عن الرئيس السابق محمد مرسي قائلاً: «احنا طلعنا بنعيب على الصعايدة.. تعالى شوفوا مرسي»..
يضحك مبارك والطبيب الخاص..
يستكمل مبارك: «بتوع الجزيرة اطردوا امبارح من المؤتمر بسأل ايه الهيجان ده قالوا» في اشارة الى طرد مدير مكتب قناة الجزيرة وطاقمها من المؤتمر المشترك للقوات المسلحة، ووزارة الداخلية حول أحداث الحرس الجمهوري.. فيرد الطبيب: «بيزيفوا الحقائق».
الحديث هنا دخل منطقة مهمة وحساسة.. يتحدث الرئيس الأسبق عن سيناء وما يتم فيها من عمليات ارهابية وأحداث عنف..
يقول مبارك: «الله يكون في عون قريبك اللي في سيناء.. بعد ما مرسي أفرج عن الناس دول سيناء باظت.. أنا فاكر أيام حبيب العادلي جيت أعمل اجتماع مع رؤساء القبائل.. طلعوا ولا ليهم لازمة العيال الشباب اللي تحتهم هما اللي ممشينهم.. الناس الكبيرة ديه ديكور ماتقدرش تعمل حاجة.. فكان حبيب العادلي بيعتقل العيال المجرمين دول.. فكان فيه هدوء.. والجيش كان بيسايرهم فدلوقتي ظاتوا»..
هنا تستطيع ان تفهم وجهة نظر مبارك الأمنية ولماذا كان يعتمد على قبضة حبيب العادلي، والتعامل المحكم في سيناء.
الملفات الحساسة ممتدة في قضية لا تزال غامضة حتى الآن.. وهي قصة اغتيال الـ16 جندياً على الحدود في رفح.. الرئيس الأسبق اتهم حركة المقاومة الاسلامية حماس:
وقال مبارك: «هي اللي قتلت الجنود لذلك هما مش عايزين ينطقوا.. ومرسي مش عايز ينطق بكلمة علشان هما اللي هربوه وقت الثورة.. الثورة ابتدت على يد أمريكا من 2005 وكنت حاسس، وهما قالولي ده وأنا قولتلهم على العموم أنا في 2011 هسيب الحكم مش لابني ولا حاجة زي ما بيقولوا توريث وبتاع، وابني اتهرى شتيمة»..
ويتابع: «أمريكا هي اللي طلعت القصة بتاعت جمال والتوريث ديه.. احنا نظام جمهوري والبلد عايزة حد من القوات المسلحة وليه علاقة بيها.. الرئيس القادم لمصر.. السؤال الذي يشغل بال المصريين هذه الأيام..
قال الطبيب لمبارك: «كل الناس بتقول الكلام اللي حضرتك قولته.. ان مصر عايزة حد ميري يمسكها.. احنا جربنا ده وجربنا ده وعايزين نرجع للعسكري لا مدني ولا بتاع»..
يرد مبارك: «لازم حد من الجيش يبقى قوي وعنده كاريزما»..
يقاطعه الطبيب: «الناس بتتكلم عن حد من اللي خرجوا بقى» في اشارة الى أعضاء المجلس العسكري الذي أقالهم مرسي عقب أحداث رفح الأولى..
يجيب مبارك: «أه ناس من اللي خرجوا وفيهم ناس كويسة جداً».. يقاطعه الطبيب: «بدأ اسم سامي عنان يتردد.. فيه ناس بتقول كويس وناس بتقول لا»..
يرد مبارك: «لا ده ميقدرش على البلد»..
فيرد الطبيب: «مش هينفع ناس من المحروقين اللي اتقدموا قبل كده».. فيجيب مبارك: «أه»..
واستكمل: «وفي 2010 انقطعت كل الاتصالات بينا وحسيت انهم عايزين يمشوني بأي ثمن»..
بعد قرار اخلاء سبيل الرئيس الأسبق في قضية هدايا الأهرام لاستنفاد مدة الحبس الاحتياطي، وعدم صدور حكم في القضية وعقب 30 يونيو..
يهنئ الطبيب مبارك: «ده خبر كويس الحمد لله الناس مبسوطة»..
فيرد مبارك «الحمد لله».. وأثار الافراج عن مبارك ردود أفعال غاضبة، اذ أعربت عدة أحزاب وحركات مصرية عن استيائها، ورفضها لقرار المحكمة.
يستكمل الطبيب: «المنايفة كمان مبسوطين»..
يتدخل أحد أفراد الحراسة في الحديث ويسأل الطبيب: «وهما عاملين ايه بعد ما الناس ماتت في المظاهرات الأخيرة وحادث رفح الأخير من عندهم»..
يجيب الدكتور: «والله الناس حزينة.. وكان لسه حد بيكلمني من قرية مات فيها 4 وبلدنا اسمها فيشة الكهربا مات فيها 4 كمان.. الناس طلعت حرقت بيوت الاخوان وولعوا في المحلات»..
يتدخل مبارك في الحديث: «شيء غريب في الحادث ده.. ده قتلوا الجنود وكتفوهم من ورا»..
الدكتور يسأل مبارك: «هل حد منهم يعمل الكلام ده – في اشارة الى جماعة الاخوان وأنصارهم – مش يهود أو اسرائيليين يعني؟!»..
يجيب الرئيس الأسبق: «لا لا اسرائيل ماتعملش كده.. دول مجانين.. عندهم حالة جنان – يقصد الاخوان-»..
يتابع الدكتور: لسه ولد من عندهم كاتب على الفيس بوك هنطلع في مظاهرات نطالب بالغاء حكم العسكر.. يعني مصرين برضه على المواجهة والمجابهة ده غباء.. بيخبطوا في الجيش والدولة»..
يؤكد مبارك: «غباء خالص مفيش دماغ»..
فيسأل الطبيب: «بس أعتقد ان الأمور هتهدى دلوقتي بعد الاعتقالات ديه»..
يجيب مبارك: «أه طالما بيلم الرؤوس.. الشباب هتهدى».. يتابع الدكتور: «أنا بشبههم بعساكر الأمن المركزي بياخدوا تعليمات وبينفذوها بالحرف.. وشايلين مخهم وحاطين بدالة بلاستر علشان ميفكروش.. فأنا في تصوري الدنيا هتهدى»..
يتحدث مبارك: «أه الدنيا هتهدى.. دول لو اتلموا الموضوع هيخلص.. حبيب العادلي كان بيعتقل 2000 واحد ويلم الدنيا»..
يتدخل الطبيب: «أنا في تصوري حبيب العادلي لو طلع».. قبل ان يكمل الدكتور الجملة قال مبارك: «يطلع بس 3 أيام وهيخلص الدنيا»..
فيكمل الطبيب الجملة: «أنا قولت لحبيب بيه الناس عايزين حضرتك بس أسبوعين تلملهم الدنيا فرد علي: قالي ده كان زمان هما فاكرني مغفل»..
يضحك مبارك.. بينما يكمل الطبيب حديثه: «لما كنت معاه آخر مرة في رمضان بقوله الصيام أخباره ايه.. قالي الصيام مابيتعبنيش.. قولتله وبتصلي التراويح قالي أه.. قولتله امتى.. قالي بعد العشا».. فضحك هو ومبارك معاً وقال: «لذيذ حبيب بيه».. فتابع مبارك: «كان لممهم كويس»..
حديث أكثر أهمية واستراتيجية حول مستقبل سيناء ويفجر مفاجآت لأول مرة حول خطة اسرائيل لتمكين أهالي غزة في سيناء..
يتحدث عنها مبارك قائلاً: «اسرائيل عايزة تزق بتوع غزة لسيناء، وقالي ده بصراحة نتنياهو قبل ما أمشي من الحكم بـ6 شهور.. لقيته جايبلي خريطة بيقولي فيها آدي حدودنا وآدي قطاع غزة.. لو سبنا بتوع غزة دول في أي حته.. ولقيتوا بيشاور على سيناء.. قولتله نسيبهم فين؟!!.. انس الموضوع ده forget it».. وتابع مبارك: «أصلي أنا صريح جداً في الحاجات ديه ودوغري على طول»..
فقاطعه الدكتور: «هو قالها كده بصراحة»..
رد الرئيس الأسبق: «هو قالها جس نبض.. قولتله انسى الموضوع الا لو عايز حرب.. لا أنا ولا أتخن مني يقدر يهوب ناحية الحدود.. احنا عملنا بالوة في قضية طابا».
نقلا عن «اليوم السابع»
